मङ्सिर ३०, शनिबार
मकवानपुर ।
गायक यज्ञराज उपाध्यायद्वारा लिखित ‘काली-कर्णालीको लोकसाहित्य र संस्कृति’ पुस्तक लोकार्पण भएको छ ।
नेपाल प्रज्ञा प्रतिष्ठान कमदालीमा संस्कृतिविद् डा. जगमान गुरूङलगायतका व्यक्तिहरूको उपस्थितिमा लोकार्पण भएको उक्त पुस्तक बुकहिल पब्लिकेसनद्वारा प्रकाशन गरिएको हो ।
कार्यक्रममा संस्कृतिविद् डा. जगमान गुरूङ, प्रा.डा. वीणा पौड्याल, डा. नवराज लम्साल र सुभाषचन्द्र भण्डारीले मन्तव्य व्यक्त गर्नुभयो ।
नेपालीहरूको जनजिब्रोमा रहेको चर्चित देउडा गीत ‘राइझुमा’ का गायक उपाध्यायको उक्त पुस्तक २ दशकदेखि अथक मेहनतपश्चात् पुस्तकाकार कृति ९८४ पृष्ठ र मूल्य ३ हजार रूपैयाँ रहेको र उक्त पुस्तकमा सुदूरपश्चिम तथा कर्णाली प्रदेशमा प्रचलित लोकसाहित्यका विभिन्न विधा-उपविधाहरू उल्लेख गरिएका छन् ।
पुस्तकका सम्बन्धमा प्रकाशक बुकहिलका प्रमुख भुपेन्द्र खड्काले भन्नुभयो- ‘जीवन त सबैको एउटै होला तर अर्को जुनीकाले पनि पढ्न सक्ने एउटा किताब प्रकाशन गर्न पाएकोमा निकै गर्व लागेको छ ।’
यस्तै वर्ष २०७८ को मदन पुरस्कार विजेता अग्नि महाकाव्यका सर्जक डा. नवराज लम्सालले पुस्तकमा वर्णित कतिपय संस्कृति र झाँकी साक्षी राखेर विमोचन गरिनुले विशेष अर्थ रहेको बताउनुभयो । साथै पृथ्वीनारायण शाहको दिव्योपदेशमा रहेको भाषा सुदूरपश्चिमबाट आएको भाषा भएकोले नेपालको इतिहासमा यो क्षेत्रबाट ठूलो योगदान रहेको र मूल प्रवाहमा नआएका जातजाति, भाषाभाषी, चालचलन अनेकानेक विषयवस्तु यसै पुस्तकमा उल्लेखित रहेको जानकारी दिनुभयो ।
लामो अनुसन्धान र खोजपश्चात् प्रकाशित पुस्तक इतिहास तथा संस्कृतिकर्मीका साथै आम पाठकका लागि एक महत्वपूर्ण दस्तावेज हुनसक्ने साहित्य सर्जकहरूले बताएका छन् ।
कार्यक्रममा प्रशंसा संरक्षण समूह, काठमाडौंबाट समारोहमा उपस्थित हुनेहरूलाई स्वागतार्थ मौलिक पोषाकसहित गौरा, हुड्केली, न्याउल्यालगायतका झाँकी प्रस्तुत गरियो ।
लेखक उपाध्यायले राइझुमा गीत समेत गायन गर्नु भएको सो कार्यक्रममा साहित्य सर्जक तथा साहित्यप्रेमीहरूको बाक्लो उपस्थिति रहेको थियो ।