मङ्सिर ३०, शनिबार
मकवानपुर ।
कथाकार विष्णुप्रसाद पौडेल अपरिचितको `धन्य मेरा बा !´ लघुकथासङ्ग्रह सार्वजनिक भएको छ । टाँडीस्थित न्यू क्यापिटल कलेजमा शनिबार आयोजित कार्यक्रममा पौडेलको तेस्रो पुस्तक `धन्य मेरा बा !´ सार्वजनिक गरिएको हो । प्रमुख अतिथि कथाकारकी आमा शारदा पौडेलसहित साहित्यकार केशवराज आमोदी, लकाश पौडेल, धनराज गिरी, कृष्णप्रसाद सापकोटा, ईश्वरी ओझा र प्रकाश चापागाईंले पुस्तक सार्वजनिक गर्नु भएको हो ।
पुस्तक सार्वजनिकपछि समालोचक केशवराज आमोदीले कृतिको समीक्षात्मक टिप्पणी राख्नु भयो । पौडेलका कथाहरूले विविध सन्दर्भका संयोग, वियोग, प्राप्ति, अप्राप्तिजन्य घटना, परिघटना र दुर्घटनाहरूलाई चित्रण गरेको आमोदीले बताउनु भयो । कतिपय कथाले यौन मनोविज्ञानसँगै राजनीतिक स्खलन, सामाजिक रीतिरिवाजका विचलन, लुटपाट, गरिबी, शोषण, विदेश पलायन, अन्धविश्वास र तस्करीलाई पनि समेटेकोले कथाहरूमा विविधता भएको उहाँले बताउनु भयो ।
कार्यक्रममा अक्षर समूह चितवनका अध्यक्ष रमेश प्रभात, डा. केशवराज चालिसे, डाक्टर एकनारायण पौड्याल, डाक्टर धनेश्वर भट्टराई, राजेन्द्र हमाल, प्रकाश चापागाईं, गजल मञ्च चितवनका अध्यक्ष लेखराम सापकोटालगायतले शुभकामना मन्तव्य राख्नु भयो ।
पौडेलका यसअघि `तरङ्ग जिन्दगीका´ हाइकूसङ्ग्रह (२०७६) र `पाँच रत्न एघार फूल´ समीक्षासङ्ग्रह (२०७८) प्रकाशित छन् । त्रिवेणी साहित्य प्रतिष्ठान नवलपरासीले प्रकाशन गरेको यस कृतिमा ५४ वटा कथा छन् । पुस्तकको मूल्य ३२५ छ । कृतिलाई सम्पूर्ण किताब नारायणगढले वितरणको जिम्मेवारी लिएको सञ्चालक लेखराम सापकोटाले जानकारी गराउनु भयो ।