पौष १४, शनिबार
मकवानपुर ।
विज्ञान शिक्षक समाज (STAN) मकवानपुरद्वारा आयोजित माध्यमिक तह (कक्षा ९-१०) स्तरीय विज्ञान हाजिरी जवाफ प्रतियोगिता २०८० मा जनप्रिय मावि विजयी भएको छ । प्रतियोगितामा तुल्सीमेहर मेमोरियल मावि दोस्रो र नवोदय शिशु सदन तेस्रो भएको हो । क्रमशः ५ हजार, ४ हजार र ३ हजार रुपैयाँ पुरस्कार राशि रहेको सो प्रतियोगितामा थाहा नगरपालिका, मनहरी गाउँपालिका गरी जिल्लाभरका कूल १८ स्कुल सहभागी भएका थिए । प्रतियोगीहरूलाई प्रमाणपत्र प्रदान गरिएको सो कार्यक्रममा अतिथिहरूलाई मायाको चिनो समेत प्रदान गरिएको थियो ।
पहिलो चरणबाट ९ विद्यालय छनौट गरी सञ्चालन गरिएको प्रतियोगिता विज्ञान शिक्षक समाज मकवानपुरका अध्यक्ष खेमराज लामिछानेको सभाध्यक्षता, राष्ट्रिय परीक्षा बोर्ड मकवानुर प्रमुख कृष्ण घिमिरेको प्रमुख आतिथ्यता र मकवानपुर बाल विद्या सदन (एमबिबिएस) का निर्देशक सुदीपराज गिरीको विशिष्ट आतिथ्यतामा कार्यक्रम सञ्चालन भएको हो ।
विज्ञान शिक्षक समाजले नियमितरूपमा शैक्षिक प्रदर्शनी, वक्तृत्वकला प्रतियोगिता, कार्यशाला, तालिम आदि लगायत विभिन्न शैक्षिक कार्यक्रमहरू गर्दै आइरहेको छ । आगामी दिनमा समेत यस्ता गतिविधिका साथै अझ रचनात्मक क्रियाकलापहरूलाई निरन्तरता दिइने विज्ञान शिक्षक समाज मकवानपुरका अध्यक्ष खेमराज लामिछानेले बताउनुभयो ।
पुरस्कार तथा आन्तरिक व्यवस्थापन मकवानपुर बाल विद्या सदनले गरेको सो कार्यक्रम सोही विद्यालयको प्राङ्गणमा आयोजना गरिएको हो ।
विज्ञान शिक्षक समाज मनहरीका अध्यक्ष ओमप्रकाश सापकोटा, मकवानपुरगढी गाउँपालिका अध्यक्ष दीपेन्द्र यादव र हेटौंडा उपमहानगरपालिका सचिव सुदर्शन पौडेल अतिथि रहनु भएको कार्यक्रमलाई विज्ञान शिक्षक समाजका जिल्ला सचिव सुवास खनालले सहजीकरण गर्नु भएको हो ।