५ साउन, हेटौंडा
नवसर्जक साहित्य चौतारी नेपालका वरीष्ठ उपाध्यक्ष एवम् बालकवि विभूति अधिकारीको ‘अर्जुनदृष्टि’ नामक कविता सङ्ग्रह एक विशेष समारोहका बीच विमोचन भएको छ ।
बाल साहित्यकार विभूति अधिकारीको पुस्तक ‘अर्जुनदृष्टी’ को विमोचन कार्यक्रममा छन्द तरङ्गका संयोजक अग्रज छन्द कवि एवम् समालोचक प्रा. डा. रामप्रसाद ज्ञवालीको अध्यक्षतामा आयोजित समारोहमा वरिष्ठ भाषाविद्, बालसाहित्य अन्वेषक/अभियन्ता प्रा. डा. चुडामणि बन्धुको प्रमुख आतिथ्यता रहेको थियो ।
कार्यक्रममा नेपाल प्रज्ञा प्रतिष्ठानका निवर्तमान सदस्य सचिव जगत् उपाध्याय ‘प्रेक्षित’, काव्य विभागका निवर्तमान प्रमुख हेमनाथ पौडेल, बालसाहित्य एवम् लोकवार्ता विभागका निवर्तमान प्रमुख प्रा. डा. देवी नेपाल, सिक्किमका कवि, प्राध्यापक एवम् नेपाली भाषाका अभियन्ता तेजमान बराइली, कवि /समालोक प्रभा भट्टराईलगायतको विशिष्ट आतिथ्य रहेको थियो भने नवसर्जक साहित्य चौतारी नेपालका संरक्षक एवम् परिकल्पनाकार दीपक गौतम, सल्लाहकार एवम् पुरस्कार संस्थापक विष्णु न्यौपाने, कृतिकारका पिता रामप्रसाद अधिकारी, माता गायत्री भट्टराई, एम्बिसन एकेडेमीका प्रिन्सिपल देवी घिमिरेलगायत ३०० भन्दा बढी साहित्यकार/साहित्यानुरागीको आतिथ्य एवम् उपस्थिति रहेको थियो ।
कोभिड कहरका समयमा २०७७ जेठदेखि हेटौँडाबाट साहित्य सर्जक दीपक गौतमले सञ्चालन गर्नुभएको ‘नवसर्जककेन्द्रित अनलाइन साहित्यिक प्रशिक्षण अभियान’ बाट छन्दमा कलम चलाउन थालेका धनगढी कैलालीका विभूति अधिकारीले २०७७ चैत २ गते ‘अद्भुत इन्द्रेनी’ नामक खण्डकाव्यमार्फत् नेपाली साहित्यमार्फत् आफ्नो सशक्त उपस्थिति जनाइसक्नु भएको छ ।
ऐरावती प्रकाशनद्वारा प्रकाशित ‘अर्जुनदृष्टि’ कवितासङ्ग्रहमा शास्त्रीय छन्दमा रचित विविध भावका ४९ वटा कविताहरू सङ्कलित रहेका छन् । कार्यक्रममा बोल्ने सम्पूर्ण वक्ता तथा अतिथिहरूले विभूतिमा काव्यप्रतिभा प्रचुर रहेको र उहाँद्वारा रचित दुवै कृति छन्द, भाव, विचार, बिम्ब, प्रतीक तथा अलङ्कार प्रयोगका हिसाबले उच्च कोटीको रहेको र ‘अर्जुनदृष्टि’ मा समाविष्ट ४९ वटै कविता स्तरीय रहेको विचार अभिव्यक्त भएका छन् । विभूति अधिकारीको १७ ओैँ जन्मोत्सवका अवसरमा आयोजित विमोचन कार्यक्रममा उपस्थित सबै साहित्यकार/साहित्यानुरागीलाई कृति निशुल्क उपलब्ध गराइएको थियो ।
नेपाली छन्द कविताको मानकीकरण र स्तरीकरणको अभियानमा लागिरहेको संस्था छन्द तरङ्गद्वारा आयोजित कार्यक्रम नवसर्जक साहित्य चौतारी नेपाल, ऐरावती प्रकाशन र एम्बिसन एकेडेमीले सहकार्यमा पद्मोदय माध्यमिक विद्यालय, काठमडौंको सभाहलमा सम्पन्न भएको हो ।
कार्यक्रमको सहजीकरण नवसर्जक साहित्य चौतारी नेपालका महासचिव समर्पण न्यौपानेले गर्नु भएको थियो ।
संप्रस पौडेल, हेटौंडा, मकवानपुर
