मकवानपुर । झरना साहित्यिक परिवार मकवानपुरको २९९ औँ साहित्य शृङ्खलाका अवसरमा चित्रकला प्रशिक्षण तथा कार्यशाला शुक्रबार बकैया–३, मकवानपुरस्थित बुद्ध माविमा सम्पन्न भएको छ ।
हरेक महिना नियमित शृङ्खलाको आयोजना गर्दै आइरहेको झरना साहित्यिक परिवारले आउँदो फागुनमा हुने पाँचौँ बकैया कला–साहित्य महोत्सवको पूर्वसन्ध्यामा यस कार्यशाला आयोजना गरेको हो।
मकवानपुरको बकैया गाउँपालिका भित्रका विभिन्न छ वटा माध्यमिक तथा आधारभूत विद्यालयका गरी १०० भन्दा बढी विद्यार्थीहरूको सहभागिताका माझमा यस कार्यशाला सम्पन्न भएको थियो । कार्यशालामा महेन्द्र माध्यमिक विद्यालय, बुद्ध माध्यमिक विद्यालय, कर्मप्राप्ती माध्यमिक विद्यालय, जनक माध्यमिक विद्यालय, कालीदेवी माध्यमिक विद्यालय र बाघभैरव आधारभूत विद्यालयका विद्यार्थीहरूको सहभागिता रहेको थियो।
प्रशिक्षकका रूपमा रहनुभएका चित्रकला शिल्पी सूर्य सन्यासीले विद्यार्थीहरूमा चित्रकला सम्बन्धी आधारभूत ज्ञान दिनुका साथै हरेक विद्यार्थीले आफूभित्र लुकेको कलाको पहिचान गरेर त्यसलाई बाहिर निकाल्न सकेमा आफ्नो जीवनमा केही गरेर देखाउन सक्ने धारणा राख्नुभएको थियो।
कार्यक्रममा बुद्ध माध्यमिक विद्यालयका शिक्षक द्वय हरिप्रसाद घिमिरे तथा छवि बिक, कर्म प्राप्ति माध्यमिक विद्यालयका शिक्षक तथा झरनाका कोषाध्यक्ष कृष्ण घतानी, बाघभैरव आधारभूत विद्यालयका शिक्षक कृष्णप्रसाद घिमिरे, झरना साहित्यिक परिवार मकवानपुरका उपाध्यक्षद्वय चिरञ्जीवी लामिछाने र गायत्री रुपाखेतीको उपस्थिति रहेको थियो।