मकवानपुर । युद्ध पत्रकार डाक्टर दिपेन्द्र रोकायाद्वारा लिखित ‘कर्णालीको मर्म’ पुस्तक माथि परिचर्चा गरिएको छ । कर्णाली प्रदेशको राजधानी सुर्खेतको वीरेन्द्रनगरमा रोकायाद्धारा लिखित ‘कर्णालीको मर्म’ पुस्तकमाथि विचार विमर्शसहित परिचर्चा गरिएको हो ।
कार्यक्रममा बक्ताको रुपमा मध्यपश्चिम विश्वविद्यालयका उपकुलपति प्रा.डा. नन्दवहादुर सिंह, कर्णाली प्रदेश योजना आयोगका उपाध्यक्ष योगेन्द्रवहादुर शाही र लेखक तथा सामाजिक अभियान्ता डा. नवराज केसीले समिक्षा गरेका थिए ।
‘कर्णालीको मर्म’ नामक पुस्तक माथि परिचर्चा गर्दै वालरोग विशेषज्ञ तथा सुन्यको मुल्य पुस्तकका लेखक डा. नवराज केसीले कर्णाली वुझने इच्छा भएका र कर्णालीको वारेमा अध्ययन गर्नेहरूको लागि आधारभुत स्रोत भएको बताए । कर्णाली कस्तो छ भन्नेहरूका लागि आधारभुत ज्ञानको स्रोत ‘कर्णालीको मर्म’ भन्ने पुस्तक भएको चर्चा गरे । उनले युद्ध पत्रकारिता, राजनीतिक खोज अनुसन्धान गर्दै आएको ब्यक्तिले लेखेको पुस्तक अनुसन्धानमुलक भएको धारण ब्यक्त गरे । उनले केन्द्रदेखि मोफसलसम्मको पत्रकारिता क्षेत्रमा देखिएको कमी कमजोरी हेर्ने ऐना भएको उल्लेख गरेका थिए । पत्रकारिता जगतबाट भनिएका हरेक कुरालाई आम मानिसले आधिकारिक धारणा बनाउँछन्, लेखक रोकायाले कर्णाली प्रदेशमै केन्द्रित भई कर्णालीको भुगोल, जाति, भाषा र साँस्कृतिक अबस्थालाई केलाएर आउनैपर्ने विषयवस्तु समेटेर पुस्तक तयार पारेको उनको भनाइ छ ।
कर्णाली प्रदेशका योजना आयोगका उपाध्यक्ष योगेन्द्रबहादुर शाहीले नेपाल एकीकरणमा कर्णालीले देखाएको विरताको स्मरण गर्दै पुस्तकमा कर्णाली समग्र चित्र आउनुपर्नेमा जोड दिए । कर्णालीको विकासमा महत्वपुर्ण योगदान पुग्ने भन्दै शाहीले धेरै विषयहरु साझा रुपमा आएको वताए । युद्धदेखि शान्ती हुदै लेखकले लेखेका विषयवस्तु कर्णालीबारे अनुसन्धान गर्नेहरूको लागि निकै सहयोगी हुने विश्वास ब्यक्त गरे । पुस्तकमा लेखकले कर्णालीको इतिहास, वीरता, भुगोल, संस्कृती लगाएको गतिलो परिचय दिएको उल्लेख गरे ।
यस्तै, मध्यपश्चिम विश्वविद्यालयका उपकुलपति प्रा.डा नन्दबहादुर सिंहले कर्णालीको माटोमा जन्मिएको युवाले गरेको खोज अनुसन्धान कर्णाली परिवर्तनको महत्वपुर्ण दस्तावेज भएको उल्लेख गरे । पुस्तकमा कर्णालीको राजनिति, योजना, विकास र सभ्यताको प्रतीकलाई लेखकले देखाउन खोजेको बताए । युवा पुस्ताको लागि अत्यन्त काम लाग्ने यस्तो दृष्टि लेखकले अगाडी सारेको सिंहले बताए । ‘कर्णालीको मर्म’ पुस्तकले कर्णाली विकासको रुपरेखा प्रस्तुत गर्न मेहनत गरेको उनको भनाइ छ ।
लेखक डा. दिपेन्द्र रोकायाले समिक्षाको रुपमा आएका रचनात्मक सुझावहरूलाई आत्मासाथ गरेको बताए । कर्णालीबारे गहन अध्ययन गरेर पुस्तक लेखन शुरु गरेकोले भुई मान्छेदेखि युद्ध हुदै कर्णालीको विकासका योजना निमार्णको तहमा पुग्दा समेतको यथार्थ अनुभुती, भोगाई अब कसरी अगाडी बढ्न सकिन्छ भनेर ‘कर्णालीको मर्म’ पाठकका बीचमा ल्याएको उनले जानकारी दिए ।
कर्णाली साहित्य समाज सुर्खेतको आयोजना तथा मध्यपश्चिम विश्वविद्यालय सुर्खेतको सहकार्यमा पुस्तकमाथी परिचर्चा गरिएको समाजका अध्यक्ष खगेन्द्रप्रसाद अधिकारीले बताए ।
कार्यक्रममा विश्वविद्यालयका प्राध्यापकहरु, विद्याथीहरु, सरकारी तथा गैर सरकारी निकायका प्रमुख तथा प्रतिनिधिहरू, नागरिक अगुवा तथा पत्रकारहरू लगायतका सरोकारवालाहरूको सहभागिता रहेको थियो ।