फागुन ३, बिहीबार
मकवानपुर ।
साहित्य सङ्गम मकवानपुरको आयोजनामा साहित्य सर्जक दीपक समीपको नवीन पुस्तक ‘नदीको राजमार्ग’ माथि विमर्श कार्यक्रम हुने भएको छ ।
समीक्षक घनश्याम घिमिरेले कृतिमाथि समीक्षा गर्नुहुनेछ ।
फागुन ६ गते आइतबार साहित्य सङ्गम मकवानपुर तथा सिस्नुपानी नेपालको संयुक्त सभाहलमा कार्यक्रम आयोजना हुने साहित्य सङ्गम मकवानपुरका सचिव मनोज पोखरेलले जानकारी दिनुभयो ।
यस्तै सङ्गम अध्यक्ष डीबी बर्तौलाद्वारा स्थापित ‘बहादुरनन्द स्मृति मुक्तक पुरस्कार २०८०’ बाट मुक्तक मञ्च मकवानपुरले उहाँलाई सम्मान गर्दैछ ।
पोखरेली युवा सांस्कृतिक परिवारका पूर्व अध्यक्ष र वर्तमान सल्लाहकार, गजल सन्ध्या पोखराका पूर्व अध्यक्ष र वर्तमान सल्लाहकार रहनु भएका उहाँ मुक्तक मञ्च केन्द्रीय समिति पोखरा र पुछारसिटे अभियानका सल्लाहकार हुनुहुन्छ । लघुकथा प्रतिष्ठान पोखराका सदस्य, नेपाली लेखक संघ गण्डकी प्रदेशका कोषाध्यक्ष र अक्षर यात्राका संस्थापकका साथै संरक्षण कविता आन्दोलनका संस्थापक सदस्य समीप लघुकथा, मुक्तक, गजल लगायतका सिर्जनामा कलम चलाउनुहुन्छ ।