मकवानपुर । नेपाल गजल प्रतिष्ठानले यस वर्ष बरिष्ठ गजलकार एक जना तथा नवोदित गजल साधक एक जना गरी दुई जना गजल साधकहरूलाई पुरस्कार तथा सम्मान प्रदान गर्ने भएको छ ।
स्थापनापश्चात् पहिलो पटक प्रदान गर्न लागिएको ‘पद्मिल गजल बहार पुरस्कार तथा सम्मान–२०८०’ एवं ‘के लत बस्यो मलाई गजल पुरस्कार तथा सम्मान-२०८०’ क्रमश: बरिष्ठ गजलकार प्राज्ञ बूँद राना र नवोदित गजल साधक बिनोद बिम्बितलाई प्रदान गरिने भएको छ ।
३५ हजार रुपैयाँ नगद राशिको ‘पद्मिल गजल बहार पुरस्कार तथा सम्मानुको स्थापनाकर्ता काठमाडौं महानगरपालिका-१४ निवासी दीपशिखा शर्मा हुन् भने १५ हजार रुपैयाँ नगद राशिको ‘के लत बस्यो मलाई गजल पुरस्कार तथा सम्मान’को स्थापनाकर्ता कालिन्चोक-९, दोलखा निबासी गजलकार प्रदीपकुमार मैनाली हुन् ।
उक्त दुवै पुरस्कार एवं सम्मान प्रतिष्ठानले आफ्नो वार्षिक उत्सवको अवसर पारेर २०८० चैत १७ गते आयोजना गरेको ‘साङ्गीतिक गजल गुञ्जन’ कार्यक्रमका अवसरमा प्रदान गरिनेछ ।
यस सटकको साङ्गीतिक गजल गुञ्जनमा स्थापित र नवगायकरगायिकाले गजल प्रस्तुत गर्ने प्रतिष्ठानका अध्यक्ष लालकाजी श्रेष्ठले बताए । प्रतिष्ठानले हरेक २ महिनामा ‘गजल मुशायरा’समेत गर्दै आएको उनले जानकारी दिए ।
यस पटकको साङ्गीतिक गजल गुञ्जन चैत १७ गते दिउँसो १२ बजे राष्ट्रिय नाचघर, जमलमा हुने बताइएको छ ।
दुवै पुरस्कार तथा सम्मान छनोट समितिमा गजलकारहरू रवि प्राञ्जल, करुण थापा, टक गुरुङ, आवाज शर्मा र प्रमोद थापा थिए ।