१४ चैत्र, मकवानपुर / –नवसाहित्य अनलाइन । विश्वभरिका लेखक तथा साहित्यकारहरूलाई एकै ठाउँमा जमघट गराउने उद्देश्यका साथ अन्तर्राष्ट्रिय प्रगतिशील काव्य गोष्ठी हुने भएको छ । प्रगतिशील लेखक सङ्घको आयोजनामा हुने सो गोष्ठी नेपालको पर्यटकीय जिल्ला इलामको श्रीअन्तुमा ज्येष्ठ १२ गते हुने भएको छ ।
प्रलेसका महासचिव डा.देवी दुलाल क्षेत्रीद्वारा हस्ताक्षरित प्रेस वक्तव्य अनुसार नेपालको साहित्यलाई विश्व स्तरमा चिनाउने तथा अन्य देशका प्रगतिशील साहित्यबाट नेपालका साहित्यकारले सिक्न नै काव्य गोष्ठी आयोजना गरिएको बताइएको छ । विश्व स्तरका प्रगतिशील साहित्यकारहरूको सिर्जनालाई प्रस्फुटित गर्ने उद्देश्यका साथ व्यापक तयारी तथा प्रचार प्रसार पनि चलिरहेको आयोजकले जानकारी गराएको छ ।
जारी विज्ञप्ति अनुसार गोष्ठी भन्दा एक दिन अगाडि ज्येष्ठ ११ गते सङ्घको परिषद् बैठक समेत आयोजना गरिएको छ । सो बैठकमा सम्पूर्ण केन्द्रीय सदस्य, परिषद् सदस्य तथा सल्लाहकारहरूको उपस्थिति रहने छ ।
गोष्ठीको अवसरमा प्रलेस २९औँ रारा विशेषाङ्क समेत लोकार्पण गरिने आयोजकले बतायो ।