जेष्ठ १३, मकवानपुर । नवसाहित्य अनलाइन ।
रोल्पा नगरपालिका, नगर साहित्य, कला तथा सङ्गीत प्रतिष्ठान रोल्पाले आयोजना गरेको रोल्पा सिर्जना महोत्सवको पाँचौ संस्करण अन्तर्गत पाँचौ राष्ट्रिय कविता प्रतियोगितामा मकवानपुरका दुई कवि अनिता न्यौपाने (तृतीय) र सुबास सजल (सान्त्वना) स्थान हासिल गरेका हुन् भने सिराहा जिल्लाका अविनाश भट्टराई (प्रथम), नवलपरासीका अन्जान (द्वितीय) साथै दैलेखका दिपिन सिजापती (सान्त्वना) स्थान प्राप्त गरेका छन्।
देशभरीबाट १ सय ६३ जना कविहरुले कविता उपलब्ध गराएको र त्यसमध्ये उत्कृष्ट १० कवितालाई राष्ट्रिय प्रतियोगिताको लागि छनोट समितिले समावेश गरेको थियो भने १० उत्कृष्ट कविलाई पछाडि पार्दै भट्टराई प्रथम भएका हुन् ।भट्टराईले ‘देशजस्तो’ शिर्षक कविताबाट प्रथम भइ नगद रु ४० हजार सहित ट्रफी,मेडल र प्रमाणपत्र प्राप्त गरेका छन् ।
नवलपरासीका अन्जान प्रतीकले ‘स्याण्डग्लासःसृष्टिको काउन्ट डाउन’ शिर्षक कविताबाट द्वितीय भइ नगद रु ३० हजार सहित ट्रफी, मेडल र प्रमाणपत्र प्राप्त गरे । मकवानपुरका अनिता न्यौपानेले ‘हल्ला नगर्नुस् न, नानीहरू खेलिरहेछन्’ शिर्षक कविताबाट तृतीय भइ नगद रु.२० हजार सहित ट्रफी,मेडल र प्रमाणपत्र प्राप्त गरे । दुई जना मध्ये एक जना मकवानपुरका सुवास सजलले ‘ऐँठन’ शिर्षक कविताबाट सान्त्वना भइ नगद रु १० हजार सहित प्रमाणपत्र प्राप्त गरे । यस्तै अर्का दैलेखका दिपिन सिजापतीले “इच्छापत्र” शिर्षक कविताबाट सान्त्वना भई नगद रु १० हजार र प्रमाणपत्र प्राप्त गरे ।
निर्णायक मण्डलमा दिनेश अधिकारी, केशव सिलवाल र प्रभा भट्टराई रहनु भएको आयोजकले जानकारी दिएको छ । राष्ट्रिय कविता प्रतियोगिता जेठ ११ र १२ गते लिबाङ र सातदोबाटोमा आयोजना भएको थियो। राष्ट्रिय कविता प्रतियोगितामा विजय भएका कविहरुलाई रोल्पा नगरपालिका,नगर साहित्य,कला तथा साङ्गीत प्रतिष्ठान रोल्पाका अध्यक्ष नवीन लोचन मगर , रोल्पा नगरपालिकाका मेयर सुरेन्द्र थापा घर्ती र रोल्पा नगरपालिकाका उपमेयर गीता आचार्यले पुरस्कार तथा प्रमाणपत्र वितरण गरेका थिए ।