मुक्तक-१
जे गरे नि सफल हुन्न भाग्य त्यस्तो ठान्यो बस्यो
पाइलैपिच्छे ठेस लाग्छ भगवानको खेल मान्यो बस्यो
जागिर खाई दिनकै फुटा पोस्ट्याउछन् साथीहरू
कर्मै खोटो आफ्नो त ठ्यास्स लाइक हान्यो बस्यो
मुक्तक-२
सुर्योदयदेखि सुर्यास्तसम्म देखिन्छ ल हेर्नुस् संसार सारा देखिन्छ
मनोरम दृश्य देखिन्छ गज्जबको हिमालको काखमा रारा देखिन्छ
हजुरको महलभन्दा त कयौं गुणा उत्कृष्ट छ महोदय मेरो झुपडी
नपत्याए हेर्न आउनुस् बिस्तारा बाटै जुन देखिन्छ तारा देखिन्छ
मुक्तक-३
मानिसमा मानवता हराइसकेछ जिउने साहास फर्केर आउदैन रे
जिन्दगीसँग नै राजनीति खेल्दिन्छन् बाच्ने आस फर्केर आउदैन रे
कसैगरी म लडि हाले भने समिपैमा राख्नु है बा कतै नलानु
सुन्दैछु अस्पताल पुगेपछि त बिरामीको सास फर्केर आउदैन रे
निजगढ-८, बारा