अहिलेको युग सूचना र सञ्चार प्रविधिको युग । युट्युब कोठा हो, घर हो, समाज हो, देश हो, संसार हो । ‘ग्लोबल भिलेज’को आजको दिनमा हुनेलाई त युट्युब कमाइखाने भाँडो हो, उपाय पत्ता लाउने चाँडो हो । यसैमा भुलेर काम बिग्रनेलाई समय सिध्याउने घाँडो हो, काम बिगार्ने ठाँडो हो, विकास छेक्ने डाँडो हो । नहेरू नहेरू भन्दा पनि औंला त्यही पुगिहाल्ने पैतालामा बिझेको काँडो हो, लाखौं भ्यूज आउनेलाई धेरै नै होला तर हेरेर पैसा नकमाउनेलाई कहिल्यै नभरिने रित्तो भाँडो हो । आज पन्ध्र टुक्रा व्यङ्ग्यहरूमा युट्युबबारे चर्चा गरिनेछ ।
१.
५ सय भ्यूज नकटाउने युट्युबर मिलियन भ्यूज कसरी ल्याउने भनेर भिडियो बनाउँछ ।
२.
‘यसरी कमाउन सकिन्छ घरै बसी बसी महिनामैँ लाखौँ’ शीर्षकमा युट्युब भिडियो बनाउनेले भ्यूजमार्फत् १ वर्षमा ७०० रूपैयाँ कमायो अरे ।
३.
छिमेकका बुढाबुढीको घरझगडा युट्युबमा ट्रेन्डिङमा परेपछि टोलटोल च्यानलले अर्को चारवटा च्यानल खोलेछ- घरझगडा, वनझगडा, अफिसझगडा, सडकझगडा । यस्तो ट्रेन्ड रूटिन अफ नेपाल बन्दवालाहरूको चलेको छ । रूटिन अफ हेटौँडा हुँदै रूटिन अफ तरूनी चोक पनि खुलिसकेछ । खासमा नामचाहिँ तरूण चोक थियो ।
४.
प्र्याङ्कका नाममा हतियार लिएर तर्साउँदै हिँड्नेलाई अर्को प्र्याङ्सटरले नक्कली पेस्तोल बोकेर भिडियो बनाएपछि प्र्याङ्कले पनि चन्द्रमा नाघेको छ । ‘प्र्याङ गोज सिरियस’ वाला भिडियो गोदाई खाएरै भए पनि पैसा कमाउने उद्देश्यले बनेको थियो । हातखुट्टै भाँच्चिएपछि युट्युबको रिपोर्टले भिडियो डिलेट गरिदियो । केटो आर्थिक रूपले लगभग कोमामा छ ।
५.
किचन रिसेपी च्यानलमा कान्छी हिट भएपछि, माइली, साहिँली, जेठी पालैपालो छाएका छन् । मैले पनि हिजो मात्रै मासुको रिसेपी हेरेर गुन्द्रुक पकाएर खाएँ । रिसेपी हेर्ने बानी लागेपछि पानी तताउने तरिका हेर्न पनि युट्युब नै चाहिने भएछ । यसका लागि आजै एक वर्षको १७ हजार ६ सय रूपैयाँ इन्टरनेट शुल्क तिरियो । मैँजस्ता दर्शकले गर्दा विश्व विजेता सेफ सन्तोषभन्दा नेपालकी कान्छी हिट हुँदै गइन् ।
६.
युट्युबमा जाडोबाट बच्ने तरिकामध्ये ब्लाङ्केट ओढेर कम्मोडमा बस्ने तरिका अर्को ट्रेन्ड भिडियो बनेको छ । यस्ता आइडियामास्टर नेपालीको आइक्यू कमजोर भन्नेहरू आफैँ संसारकै सबैभन्दा ग्वाँजे हुन् भन्न सकिन्छ ।
१०.
चुपचाप दिनभर ठिङ्ग बसेर पोस्टर देखाएर आन्दोलन गर्ने ई: भन्दा माइतिघरमा नेपालभरबाट आन्दोलित शिक्षकहरूको भिडियो खिच्न नयाँ नयाँ युट्युब च्यानल खुलेका छन् । ई: लामखुट्टेले टोक्दा पनि चुपचाप उभिइरहने तर शिक्षकहरू नाच्ने, गाउने, सडकमा सुत्ने, मन्त्री फुस्काउने नारा लगाउने । क्यामेरा र बुम किनेर युट्युबकारिता सुरू गरेको युट्युबरलाई फेरि यहीबेला कसले भन्छ- नेपालमा रोजगारी छैन । हो, नेपालमा कमाईचाहिँ छैन ।
११.
युट्युबमा भिडियो जे खिचे पनि थम्बनेलमा भिडियोभन्दा दोब्बर समय दिनु भन्ने अचुक उपाय जानेपछि कमेन्ट अफ गर्नुपर्यो । यो अधिकांश युट्युबरको (अ) सफलताको कथा हो ।
१२.
ट्विटरमा एलन मस्कले बेला बेला एलन मस्क प्यारोडीका ट्वीट शेयर गर्दछन् । युट्युबमा पनि अक्कलसहित अरूका नक्कल गर्ने हो भने कमाउन अन्त जानुपर्दैन भन्ने उदाहरण हुन् मनोज गजुरेल । रामदेव र ओशोको क्यारिकेचर गरेर पनि लाखौँ भ्युज कटाएका छन् ।
१३.
विदेशबाट फर्केर महिनामैँ ५ लाख आम्दानी लेखिएको युट्युबको पात्र विदेश पुगेको ५ वर्ष भैसक्यो तर युट्युबको भ्यूज भने ५० लाख नाघिसक्यो ।
१४.
भन्न त भाषालाई माया गर्नेहरू नेपाली मौलिक शब्दहरू लोप हुने डर छ भन्छन् । तर पैसाको लोभमा समय सिध्याउने युट्युब भिडियोको कमेन्टमा झर्राभन्दा टर्रा कमेन्टहरूमा अश्लील नै किन नहोस्, शब्दहरूको गालीको वर्षात् नै पाइनेछ ।
१५.
अर्को ट्रेन्ड हो अनबक्सिङ । टिभीदेखि आइफोनसम्मको अनबक्सिङको भिडियो राम्रै चल्ने गरेको छ । तर अनबक्सिङ भन्दैमा प्याकेटबाट इनरवियर अनबक्सिङ गर्नेलाई भेटे भने धेरैले बक्सिङ खेल्ने पक्का पक्की देखिन्छ ।
जय युट्युब ट्रेन्ड ।
संप्रस पौडेल, मकवानपुर