रोपेर आँगनमा तुलसी र पारिजात
छरेर हृदयको बारीभरि प्रेम
उमारेर शान्तिको अङ्कुर
फलाउनुछ यो भूगोललाई बाँड्न पुग्नेगरि बुद्धत्व ।
कान सुन्न चाहिरहेछ
प्रकृतिको प्रथम ध्वनि
जुन आकाशले सिकाएको हो धर्तिलाई
मन मागिरहेछ शान्तिको प्याला पिउन
जसले प्रत्येक हृदयबाट निस्किरहने आर्तनाद निभाउन सकोस् ।
आँखा देख्न चाहिरहेछ माटोमा
लहलह झुलिरहेको भाइचाराको सम्बन्ध
छाला, जो स्पर्श गर्न खोजिरहेछ अमृतप्याला
हावाको अतृप्ततालाई समेट्न खोज्दैछ मन
मलाई मैभित्रको एउटा बुद्धत्व भेट्नुछ
जसले प्रयोगशालामा परीक्षण भइरहेका
मिशाइल र आणविक हतियारहरूलाई
निषेध गर्न सकोस यो धर्तिबाट
आवाजहरू शान्तिका लागि निस्किउन्
पाइतालाहरू भ्रातित्वका लागि उचालिउन्
आफ्नो अस्तित्व शिखर चढेको
देख्न चाहने आँखाले
ननिमोठोस् अरुको विचारलाई
छायाँमा बसेर सुस्ताउन सकोस् सम्बन्धको नदी
विश्वमा प्रेमको सुन्दर बीज रोपेर
फैलाउन सकूँ संसारले मागिरहेको शान्तिको बिरुवा ।
कालीगण्डकी २, स्याङ्जा