बकैया– ४, मकवानपुर निवासी सन्तराम राई सरकारी सेवामा रहेर पनि कविता, गजल, मुक्तकलगायतका विधामा कलम चलाइरहनुभएको छ । उहाँ झरना साहित्यिक परिवार, मकवानपुरको सहसचिवका रूपमा क्रियाशील रहँदै आउनुभएको छ ।- सम्पादक
कुनै एक दिन
मतलब
कुनै दिन
आफैँलाई मारेर बाँच्नेहरूको लिस्ट
सायद ईश्वरसँग पनि छैन
पक्कै छैन
बाध्यतामा मुस्कान बेचिएका
ओठहरुको लिस्ट
आफैँ हिँडेका पाइलाहरू
मेट्दै हिँड्ने
डुङ्गा झैँ छोराछोरीहरू सम्झी
अनायासै
आमाको आँखाबाट झर्ने
आँशुहरूको लिस्ट
सानै छँदा
बाबुआमाको नाममा
फालिएका केशहरुको लिस्ट
नफक्री झरेका
शिरका लालीगुराँसहरुको लिस्ट
छैन होला
शरीरभित्र बदलिरहने
कोषहरूको लिस्ट
रोक्किनकै लागि
नरोक्की चल्ने
धड्कन अनि श्वासहरूको लिस्ट
अनि छैन होला
गन्तव्यमा नपुगी
टुक्रिने, मर्ने
करौँडौ स्पर्महरूको लिस्ट
नजन्मिएका
आइस्टाइनहरू, बुद्धहरु अनि मार्क्सहरूको लिस्ट
तर
आज एकाएक भएको
ईश्वरसँगको अनलाइन भेटमा
अचानक, ईश्वरको गुगल लिस्ट
ह्याक गरेँ र हेर्न थालेँ
अस्पष्ट नबुझिने फन्टहरू
भाषा ट्रान्सलेटर एप्समा
तब त्यहाँ भेटेँ
मर्ने बाँच्नेहरूको ‘मात्र’ लिस्ट
हाँस्ने रुनेहरूको ‘मात्र’ लिस्ट
दुःखसुख भोग्नेहरूको लिस्ट
यद्यपि हत्तार–हत्तार
खोज्दै थिएँ म
मरेर बाँच्नेहरू
बाध्यात्मक मुस्कान बोकेका ओठहरू
आमाका गह भिजाइरहने आँसुहरू
केशहरूसँगै फालिएका सम्झनाहरू
लालीगुँराास पुछिएका सिउँदोहरू
अझ भेट्दै भेटिनँ त्यहाँ
बेआकार कोषहरू
पुनः जन्म लिइरहने रगतहरू
आफै मस्त चलिरहने
धड्कन अनि श्वासहरू
बेमौत मरेका महापुरुषहरू
यी यावत लिस्टहरू
खोज्दाखोज्दै एक्कासि
खाली
खाली
खाली
मतलब,
ईश्वर आफ्नो गुगल लिस्ट
हाइड गरी अफलाइन भएछन्
र जाँदाजाँदै
एउटा म्यासेज छोडेछन्
जहाँ लेखिएको थियो
“हे मनुष्य !
मलाई अझै, युगौँयुग
ईश्वरै बन्नु छ ।”
मकवानपुर