शरदका किरणहरू जब जब दैलोमा देखा पर्छन्
अनि त्यति बेला झनै तिम्रा यादहरुले छपक्कै छोप्न आइपुग्छन् ।
मङ्गल धुनका ध्वनीहरूले
दशैँ आएको खबर सुनाउँदै हिँड्दा तब मलाई भन्न मन लाग्छ,
अरे ! तिमीहरु कति छिट्टै आएका, तिमीहरु साँच्चै आउन अल्लि हतारो ग¥यौ
मेरी आमा नै आएकी छैनन्, कसरी दशैँ आउँछ !
म सम्झिन्छु तिमीले हामी दुई भाईलाई
एकै किसिमको लुगा सिलाइदिन्थ्यौ, त्यो पनि अर्को दसैँलाई हुने गरी
नयाँ लुगा देख्नासाथ हामी कत्ति खुशी हुन्थ्यौँ र लामो सर्ट, पाइन्टमाथि लगेर पट्याउथ्यौँ
अनि हामी गाउँ भरी एक चक्कर लगाएर घर आइपुग्थ्यौं
तिमीले हामीलाई घर आइसकेपछि मात्रै चाल पाउथ्यौ
अनि तिम्रो ओठको मुस्कान अनुहारैभरी पोखिएको देख्थेँ
अहिले आफैं छानी छानी महङ्गा लुगा लगाउँदा पनि त्यो खुशी भेट्दिन आमा !
अनि
अनि याद छ तिमीलाई !
बिर्सियौ कि सम्झिरहेकी छौ !
तिमीले दिएको एक रुपैयाँ लङ्गुर बुर्जामा थापेर चार भएपछि
तिमीलाई देखाउन पारी गाउँदेखि दौडिँदै घर आइपुग्दा
त्यतिबेला तिम्रो मुहार खुशीको लाँलीले पोतिएको हुन्थ्यो
अहिले त लाखौं रुपैयाँले पनि त्यति खुशी पनि दिँदैन आमा !
अनि थाहा छ तिमीलाई,
दसैं छुट्टि पाएपछि स्कुलबाट नाँच्दै नाँच्दै घर आइपुग्दा
घरको पालीमा मेरो पर्खाइमा पिङ्ग हल्लिरहेको हुन्थ्यो
मलाई के थाहा ! हाम्रो सानो सानो खुशीलाई बटुल्न
तिमी कति दुःखको पिङ्गमा हल्लियौ भनेर !
तिमीले मुछेका राता टिका हाम्रो निधारमा वर्षैभरि मुस्काउने कसम खान्थे,
तिमीले उमारेका ति जौंका पहेँला आकुराले पनि सुख, शान्ति समृद्धी बोकेर हुर्कन्थ्यो
अनि सधैं हाम्रो शिरमा आशिर्वाद बनेर बसिरहन्थ्यो
हाँस्दैनन अचेल टिका निधारमा न शान्ति खुशी बोकेर ल्याउँछन् जमराहरु
मलाई याद छ ति दिनहरु
जतिबेला तिम्रो साडीको फुर्को समातेर
नौँ दिन नै तिमी सङ्ग भवानीको मन्दिर पुग्थेँ,
दुई हात जोडी हाम्रा लागि खै के के माग्थ्यौ तिमी
त्यतिबेला मैले बुझ्न सकेको भए म पनि त तिम्रो लागि केही माग्ने थिएँ
अनि तिमीलाई यसरी परदेशिनु नै पर्ने थिएन
तिम्रा हातले बनाएका दसैंका परिकारहरु साँच्चै मिठा हुन्थे,
खै अहिले त दसैंका स्वादहरु नै खल्लो लाग्छन्
अचेल मङ्गल धुनका ध्वनीहरुले
शान्ती होइन मनमा कोलाहल मच्चाए झैं लाग्छ,
चचहुईका आवाजहरुले
मलाई नै जिस्काए झैं लाग्छ,
तिमी नहुदाँ मामाघर पनि विरानो भए झैं लाग्छ
बरु ,
जीवनभर दसैं नआए पनि हुन्छ तर तिमी सधैं आउँनु है आमा !
दसैं त तिमी आएपछि पो आउँदो रहेछ
नारायणगढ–१,दियालो रोड, चितवन