हेटौँडा– ५ निवासी रोश्नी चौँलागाई कक्षा १२ मा अध्ययनरत रहनुभएको छ । उहाँ नवसाहित्य चौतारीको केन्द्रीय सचिव, गजल मञ्च मकवानपुरको सदस्य रहनुभएको छ । उहाँ कविता, गजल, मुक्तकलगायतका विधामा कलम चलाउँदै आउनुभएको छ । – सम्पादक
बलिदानको नरम दियो बाली
कर्मको चहकिलो प्रकाश छर्दै
तिमीले सँगालेका जिन्दगीका हर कणमा
हुर्काउन सकुँ म हृदयमा
सपनाको सिङ्गो ’नेपाल’ !
सजाउन सकुँ म हत्केलामा
भविष्यको हाम्रो, ’नेपाल’ !
नेपथ्यका फूलबारीमा सरेका बेर्नालाई
सार्नु छ रङ्गमचका विशाल फाँटहरूमा !
र त
तिमी मेटिएर गएको माटोमा
स्वाभिमानको फूलहरू फुलाउनु छ !
देशमा नवीन परिवर्तनको निम्ति
तिम्रै दृढ विश्वासका रक्तधाराहरूले
रच्नु छ पुनः पृथक् इतिहास,
अनि कोर्नु छ
स्वर्णिम नेपालको मार्गचित्र !
हामीले सिँचेको स्वप्नभूमिमा
अस्ताउनु पर्ने छैन असमयमै
कोही लखन,
कोही धर्मभक्त,
वा कोही चिनियाँलाल
कुनै काण्डमा मारिनुपर्ने छैन
तिमीहरू जस्ता देशका सान अब
देशद्रोहीहरु अब मौलाउने छैनन्
तिनका बिउहरूमा सूर्यले किरण छर्ने छैन !
जननी जन्मभूमिश्चः स्वर्गादपिः गरीयसी
म तब आत्मसात गर्ने छु
जब जनताका मौन अवधि सकिने छ,
अनि फुट्ने छ मूल एउटा बुलन्द आवाजको
अनैतिकताको खटिरामा
नैतिकताको मलम लाग्ने छ !
आततायीको मृत्युले नै गर्छ समाप्त
संसारभरका निरङ्कुश सत्ता
तर
जब सहिदको जीवन बलिदान हुन्छ
तब जन्मदिन्छ आस्तिवको पूर्ण स्वतन्त्रता !
रोश्नी चौँलागाई, मकवानपुर