यसपाली नि घुम्दैफिर्दै फेरि दसैँ आयो
पोहोर जस्तै सबैतिर खुसीयाली छायो ।
हिलो छैन फोहर छैन घमाइलो घाम छ
हराभरा बालीनाली रमाइलो याम छ ।।
सफा हुन्छ बाटोघाटो सफा हुन्छ घर
फोहर भन्नु छैन कतै घरको वरपर ।
नयाँ लुगा लगाउने मिठो खाना खाने
आमासँगै हाँस्दैखेल्दै मामाघर जाने ।।
पूजा हुन्छ भगवतीको अनेक थरि फूल
चढाउँदै भन्छन् सबै नहोस् कहिल्यै भूल ।
शिरमा लाउँछन् जमरा र टीका निधारमा
मान्यजनले आशिष दिँदा खुसी मुहारमा ।।
एक वर्षमा एकै पटक आउने ठूलो पर्व
यस्तो पर्व मनाउँदा हुन्छ हामीलाई गर्व ।
पालै पालो पिङ खेल्छौँ रमाउँदै साथी
उडाउछौँ चङ्गा हामी धेरै माथि माथि ।।
दशैँ ठूलो पर्व हाम्रो मनाउनलाई भनी
लामो छुट्टी भएको छ विद्यालय पनि ।
गुरुमाले सम्झाउनुभो घरमै बसी पढ्नू
नयाँ ज्ञान सिप सिक्दै अघि अघि बढ्नू ।।
गुरुबाले सुनाउनुभो एउटा सुन्दर कथा
त्यस्तो कथा सुनेपछि छक्क परेँ म ता ।
किताब मात्र सबै कुरा होइन बाबु नानी
घरमा पनि कति हुन्छन् सिक्नुपर्ने बानी ।।
हेटौँडा–१२, पदमपोखरी