२०५४/०५५ बाट लेखन यात्रामा साधनारत कवि वैकुण्ठ लामिछाने व्यवस्थापन शास्त्रमा स्नातकोत्तर हुनुहुन्छ । उहाँ सूचना प्रविधि व्यवसायीका रूपमा स्वरोजगार रहँदै आउनुभएको छ । विद्रोही चेतका कवि लामिछानेका विभिन्न एकल कविता वाचन कार्यक्रम भइसकेका छन्, भने उहाँ कविता, गजल, कथालगायतका विधामा निरन्तर कलम चलाउँदै आउनुभएको छ ।
झिकेर क्याल्कुलेटरको मस्तिस्कबाट
अङ्कगणितका अवयवहरू
ऊ प्रत्येक क्षण सकी/नसकी मिलाइरहेकै छ
जिन्दगीको अङ्क गणितको व्याकरण
तर पनि किन प्रत्येक रात
यसरी मध्य निद्रामा तर्साइरहन्छ
अङ्क गणितको अङ्कको औजारले कोपरेर
उसैको मस्तिष्कको भाडाको कोठाको संवेदना
र
चिथोरेर निद्राको विश्वविद्यालय
यो मध्यरातमा
के पढाउन खोजिरहेछ जिन्दगीमा ?
भर्खरै समयको ज्याला कारखानाबाट
आजाद घोषणा गरेर
थकानको घट्टमा पिसिन
लम्पसार फालिएको काँचो मासुको थुप्रोमाथि
मध्यरातमा यसरी करङको नलिहाड चिथोरेर
कुन अजकल्टो चेतना
बैङ्क किस्ताको म्यासेज उसको कानको जालीसम्म पठाइरहेछ
र बजाइरहेछ उसको निद्रामा छुट्टीको घन्टी
स्कुलमा जस्तो छुट्टीको घन्टी बज्दा सधैँ खुसी नहुने रहेछ जिन्दगी
सुका मोहोरमा रमाइरहँदा
थानको ढुङ्गाको देवता
के ऐँजेरु पलाएको छ, क्याल्कुलेटरको मस्तिष्कमा
र अङ्कका जहानहरू नै करकर खाइरहेछन्
उसका रगतमासीहरू
किन यसरी हुँडलेर उसको मस्तिष्कको गैरीखेत
बाउसे खेलिरहेछन् अङ्कगणितका पाहुनाहरू
ओसारेर अँध्यारोको कलमी
निद्राको जरा किन उखेलिरहेको छ समय
समय कुन आदेशले
चेतनाको इङ्कुबेसन कारखानाबाट
यो मध्यरातमा यसरी
भद्रगोल अङ्कका चल्लाहरू नियोजितको कोरलिरहेछ
चिथोरेर थिलथिलो मस्तिष्क
अङ्कगणितको कतिऔँ जन्मोत्सव मनाइरहेछ
नियोजित क्याल्कुलेटर
छोराको युरोप जाँदाको बैङ्कको सुकिलो ऋण
छोरीलाई अस्ट्रेलिया पठाउँदाको ऋणको कोसेली
बाआमाको उपचारमा सहकारीमा बिक्रीमा राखिएको औँठाको कालो छाप
ढोका खोल् भन्दै ड्याङ् ड्याङ् ड्याङ् ड्याङ्
जम्मै एकैपटक किन हानिरहेछन् मस्तिष्कको झिल्लीबाहिर ?
किन यसरी झेल्ली क्याल्कुलेटर
सँगैकी श्रीमतीको मस्तिष्क अङ्कको औजारले छताछुल्ल चिरिरहेछ ।
ऊ प्रश्नको अस्थिपञ्जर बोकेर सोधिरहेछ
कुन विश्वविद्यालयले पढाउँछ अङ्कगणितको व्याकरण
कुन पाठमा लेखिएको छ
मस्त निदाउने अङ्कगणितका उपायहरू
ऊ जम्मै चिरियर भित्र भित्र लगभग मृत छ
ठ्याक्कै अहिलेको समाज जस्तै भएको छ
तर मृत घोषणा नभएसम्म उसको मस्तिष्कको
ऊ सोचिरहेछ
उसले अब कहिल्यै आरामले निदाउन पाउने छैन ।
बैकुण्ठ लामिछाने, हेटौँडा–५, मकवानपुर