स्याङ्जा । गुप्ततारा स्मृति प्रतिष्ठान, वालिङ, स्याङ्जाको आयोजनामा फागुन १८ गते शुक्रवार वालिङ नगरपालिका–६, मिर्दीस्थित नेचुरल भ्यु प्वाइन्ट रेष्टुरेन्टको सभाहलमा अनन्त अर्यालको कथाकृति “अलिखित पाना” विमोचन गरिएको छ ।
गुप्ततारा स्मृति प्रतिष्ठानका अध्यक्ष अनन्त अर्यालको अध्यक्षतामा भएको कार्यक्रममा प्रमुख अतिथिको रूपमा अग्रज स्रष्टा डा. शङ्करप्रसाद गैरे रहेका थिए भने विशिष्ट अतिथिमा अग्रज कवि डा. टङ्कप्रसाद पन्थ रहेका थिए ।
कार्यक्रममा अग्रज आख्यानकार अनन्त अर्यालको पहिलो कथा कृतिको रूपमा प्रकाशित भएको “अलिखित पाना” को विमोचन गरिएको थियो । उनका यसअघि दुइ कविता सङ्ग्रह “म आलोच्य छु” (२०६०) र “अनन्त यात्रा” (२०७७) प्रकाशित छन् ।
विमोचन गरिएको कथा कृतिका बारेमा समीक्षक डा. टङ्कप्रसाद पन्थद्वारा समीक्षात्मक टिप्पणी प्रस्तुत गरेका थिए ।
कार्यक्रममा कविहरू शम्भु अर्याल, सिजन अर्याल, स्मारिका अर्याल, पारिश्वर न्यौपाने, घनश्याम अधिकारी, डिल्लीराम भण्डारी, खगेन्द्र अर्याल, नारायणप्रसाद रेग्मी, कमलप्रसाद बगाले, देवराज गैह्रे, चण्डिकाप्रसाद भट्टराई, लेखनाथ काफ्ले, ध्रुवप्रसाद शर्मा पङ्गेनी, वसन्त खनाल, आदिद्वारा आफ्ना कविता, गीत, गजल र मुक्तक रचनाहरु वाचन गरेका थिए ।
कार्यक्रममा स्वागत मन्तव्य युवा कवि वसन्त खनालले राखे भने सहजीकरण मिलन समीरद्वारा गरेका थिए ।