- नवसाहित्य
संप्रस पौडेल
हास्यव्यङ्ग्य स्तम्भको दोस्रो श्रृङ्खलामा छौँ । विगत डेढ दशकदेखि हास्यव्यङ्ग्य लेख प्रकाशनमा सक्रिय संप्रस पौडेलका लेखहरू पढेर यहाँहरूले कहिले हास्य त कहिले व्यङ्ग्य अनि कहिले हास्यव्यङ्ग्य सँगसँगै बोनस प्राप्त गर्नसक्नुहुनेछ । हाँसो उठेन भने त्यसको ग्यारेन्टी न लेखकले दिनु भएको छ, न त हामी नै दिन सक्छौँ । तर झक्झक्याइ रहनु पाठकको कर्तव्य पनि त हो नि !
च्वास्स-२
युट्युबर र उसको सब्सक्राइब गर्नेवालाबिचको कुराकानी १
पात्र १: (फोन डायल गर्दै) हेल्लो नमस्कार ।
युट्यबरः (भुसुक्कै सुतेको फोन उठाउँदै) हेल्लो नमस्ते । को बोल्नुभयो ।
पात्र १: बधाई छ है तपाईँलाई । म तपाईँको युट्युबको फ्यान ।
युट्युबरः अहो धन्यवाद धन्यवाद ।
पात्र १: तपाईँको त्यो भिडियो हेरेर म त मुर्छा परेर हाँसे नि ।
युट्युबरः हसाउने भिडियो त मैले अपलोड गरेकै छैन । कुन चाहिँ हो र ?
पात्र १: त्यही क्या त पानी उमाल्ने तरिका । जसमा चार लाइक र चौध गाली गरेका छन् नि ।
युट्युबरः अहो, त्यसले त मलाई बर्बादै बनायो नि ।
पात्र १: अरु सबै गइसके । म तपाईँको सबैभन्दा अन्तिमको सब्सक्राइबर । एकचोटी फोनै गरेर विदा होउँ कि भनेर नि ।
युट्युबरः फोन राख् ।…… युट्युबको लतले पनि करियर ड्यामेज गर्यो यार ।
युट्युबर र उसको भिडियो हेर्नेवालाबीचको कुराकानी २
पात्र २: (फोन डायल गर्दै) हेल्लो ।
युट्युबरः हेल्लो । को बोल्नुभयो ?
पात्र २: बधाई छ तपाईँलाई । तपाईँको युट्युबका भिडियो भाइरल भएछ नि ।
युट्युबरः हो र ? कुन भिडियो ?
पात्र २: कुन हुनु ? त्यही एउटै भिडियो त थियो नि ।
युट्युबरः मेरो सत्रवटा च्यानल छ । कुन चाहिँ च्यानलको भिडियो हो ?
पात्र २: जे लुकाउनुपर्ने, त्यही गोप्य खोलिदिनुभयो तपाईँले । एउटा तपाईँको च्यानल भैहाल्यो । बाँकी १६ वटा कमेन्ट तपाईँले नै अन्य च्यानलबाट गर्नुभएछ ।
युट्युबरः तोइट । फोन राख् । कस्ता कस्ता मान्छेहरु हुन्छन् ।
युट्युबर र उसको शुभचिन्तकबिचको कुराकानी ३
पात्र ३: (फोन डायल गर्दै) हेल्लो ।
युट्युबरः हजुर काँबाट को बोल्नुभयो ?
पात्र ३: एउटा प्रतिष्ठित कम्पनी एबिसीडीइले तपाईँको च्यानलाई पुरस्कृत गर्ने भएको छ । जानकारी दिनको लागि फोन गरेको ।
युट्युबरः ओहो । यो त खुसीकै कुरा भयो नि । पुरस्कार चाहिँ केका लागि रहेछ ?
पात्र ३: सबैभन्दा कम लाइक आएको ।
युट्युबरः तपाईँ जोक गर्दै हुनुहुन्छ ?
पात्र ३: नरिसाउनु न । तपाईँको घरमा कति जना हुनुहुन्छ ?
युट्युबरः अरुलाई पनि फोन गर्ने सुर छ कि क्या हो ? ८ जना छन् । किन ?
पात्र ३: नझोक्किनुस् न । त्यो तपाईँले अपलोड गर्नु भएको पानी तताउने रिसेपीवाला भिडियोमा ७ वटा लाइक आएका छन् ।
युट्युबरः यस्तो कुरा जानेर तपाईँलाई के फाइदा हँ ?
पात्र ३: भिनाजु, म कान्छी साली क्या । उपलब्धी केही छैन । जतिखेर मोबाइलमा झुण्डिएर दिदी माइत आएकी छे ।
युट्युबरः ए साली नानी, एक सब्सक्राइब र लाइक थपेर दिदीलाई पठाइदेऊ न है । अँ सुन त पोहोर स्वर्गेवास भएका ससुरा बाको स्व. दामोदर बाजे नामको अकाउन्ट बनाएर अर्को लाइक र कमेन्ट नबिर्सिऊ नि ।
