‘अद्वैत’ उपन्यासलाई ‘कविडाँडा राष्ट्रिय आख्यान’ पुरस्कार २०८०

२० भाद्र/नवसाहित्य
कविडाँडा साहित्य समाज, चितवनले २०८० सालको ‘कविडाँडा राष्ट्रिय आख्यान’ पुरस्कार कृष्ण गौतमको उपन्यास ‘अद्वैत’ लाई प्रदान गर्ने निर्णय गरेको छ ।

प्रत्येक वर्ष आख्यान कृतिलाई पुरस्कृत गर्दै आइरहेको समाजका अध्यक्ष एल.बी. क्षेत्रीद्वारा जारी विज्ञप्तिमा कृतिले पूर्वीय सभ्यताले प्रतिपादन गरेको अद्वैत सिद्धान्तलाई विभाजित विश्वलाई जोड्ने कडीको रूपमा पहिचान गरेको उल्लेख छ ।

यससम्बन्धमा समाजका अध्यक्ष एलबी क्षेत्री भन्नुहुन्छ- “यस उपन्यासले अनेक मत र विश्वासहरूमा विभक्त मानव समाज क्रमिकरुपले बिग्रहतिर उन्मुख हुँदै गएको आजको सन्दर्भमा मानवताको सार मूलतः एक रहेको र विश्वास, मत र पन्थहरूको पनि मूल एक रहेको तर्क गर्दै मानव समाजमा समभाव, परानुभूति र ऐक्य स्थापना गर्ने सार्थक प्रयास गरेको छ र यस प्रयासलाई अति परिष्कृत र बोधगम्य भाषा र ढाँचामा प्रस्तुत गरेको छ । कृतिले पूर्वीय सभ्यताले प्रतिपादन गरेको अद्वैत सिद्धान्तलाई विभाजित विश्वलाई जोड्ने कडीको रूपमा पनि पहिचान गरेको छ ।”

२०६० सालमा स्थापित समाजले १ महिनाअघि श्रेष्ठ सूचीअन्तर्गत १० कृतिहरू सार्वजनिक गरेको थियो जसमा विष्णु सापकोटाको `अडिएका पाइला´ उपन्यास, कृष्ण गौतमको `अद्वैत´ उपन्यास, रमेश सायनको `अन्तर´ उपन्यास, सानु शर्माको `अर्को देशमा´ कथासङ्ग्रह, विश्व कुइँकेलको `गोपिचा´ उपन्यास, जीवन जीवन्तको `चरैवेति´ उपन्यास, भक्त स्याङ्तानको `डम्फुको आत्मालाप´ कथासङ्ग्रह, खेम बतासको `बुढीपोल्ली´ कथासङ्ग्रह, गोविन्दप्रसाद कुसुमको `भृकुटी´ उपन्यास र रोशन थापा निरबको `सन्त्रासका साठी दिन´ सूचिकृत थिए ।

१० कृतिहरूमध्ये उत्कृष्ट ५ आख्यानहरूमध्ये पुरस्कृत कृति ‘अद्वैत’ का साथै सानु शर्माको कथाकृति ‘अर्को देशमा’, विश्व कुइँकेलको उपन्यास ‘गोपिचा’, गोविन्दप्रसाद कुसुमको उपन्यास ‘भृकुटी’ र रोशन थापा ‘नीरव’को उपन्यास ‘सन्त्रासका साठी दिन’ परेका थिए ।

यसअघि महेश थापाको `मरिचिका´ (कथासङ्ग्रह), श्याम शाहको `पथेर´ (कथासङ्ग्रह), भुवन ढुंगानाको `परित्यक्ता´ (उपन्यास), लोकराज भट्टको `छाइल´ (उपन्यास) तथा २०७९ सालमा देवीप्रसाद सुवेदीको `मनु´ उपन्यासले सो पुरस्कार प्राप्त गरेका थिए ।

शिखा बुक्सले प्रकाशनमा ल्याएको ‘अद्वैत’ का लागि नगद राशि १ लाख २५ हजार रुपैयाँ प्रदान गरिने विज्ञप्तिमा उल्लेख छ ।