युवा वर्ष मोती पुरस्कार २०८१ केदार श्रेष्ठलाई

२० भाद्र, मकवानपुर ।
नवसाहित्य । ‘युवा वर्ष मोती पुरस्कार २०८१’ बालसाहित्यकार तथा रङ्गकर्मी केदार श्रेष्ठलाई अर्पण गरिएको छ । १५९ औँ मोती जयन्तीको अवसरमा एक समारोहबिच ४० हजार रुपैयाँको थैली, स्वर्ण पदक र सम्मानपत्रले उहाँलाई पुरस्कृत गरिएको हो ।

प्रा. रामकुमार पाँडेको संयोजकत्वमा राष्ट्रिय युवा सेवा कोषद्वारा गठित मूल्याङ्कन समितिको सिफारिसको आधारमा धादिङ जिल्ला निवासी श्रेष्ठ पुरस्कृत हुनु भएको हो । बालसाहित्य र रङ्गमञ्चमार्फत् नेपाली भाषा, कला, साहित्य र संस्कृतिमा योगदानबापत पुरस्कृत श्रेष्ठ बालसाहित्य क्षेत्रमा कथा लेखन, कथा–कथन, बालनाटक, चलचित्र लेखन, निर्देशनमा सक्रिय हुनुहुन्छ ।

नेपाली साहित्यमा युवा पुस्तालाई लेखनमा हौसला दिने पुरस्कारका रूपमा चिनिएको यस पुरस्कार राष्ट्रिय विभूति तथा नेपालमा गजल विधा र छापाखानालाई स्थापित गराउने व्यक्तित्व युवाकवि मोतीराम भट्टको सम्झनामा वि.सं. २०४२ मा स्थापना भएको हो ।

४० वर्ष ननाघेका युवा सर्जकलाई नियमित प्रदान गरिँदै आएको ‘युवा वर्ष मोती पुरस्कार’ सर्वप्रथम साहित्यकार दैवज्ञराज न्यौपानेलाई प्रदान गरिएको थियो । यसअघि साहित्यकारद्वय प्रकाश पौडेल/हेम अधिकारी, महेश पौड्याल/मीनकुमार श्रेष्ठ सम्मानित हुनु भएको थियो भने २०७९ को पुरस्कारबाट मकवानपुरका युवाकवि बिर्खे अन्जान सम्मानित हुनु भएको हो ।

लेखनाथ साहित्य सदन, सोह्रखुट्टे काठमाडौँमा आयोजित कार्यक्रमका क्रममा मोतीराम भट्टले सुरू गर्नु भएको समस्यामुलक साहित्य लेखनका सम्बन्धमा कवि सम्मेलन समेत सम्पन्न भएको छ ।