कवि यश लामाको ‘बहिष्कृत आवाज’ शनिबार विमोचन हुने

आश्विन २/नवसाहित्य ।
कवि यश लामाका कवितासङ्ग्रह ‘बहिष्कृत आवाज’ असोज ५ मा एक कार्यक्रमबिच विमोचन हुन लागेको छ ।

विमोचन कार्यक्रममा वक्ताद्वयका रूपमा मकवानपुरगढी गाउँपालिकाकी उपाध्यक्ष मान कुमारी नेपाली र डा. रामजी राम रहनुहुने लामाले बताउनु भएको छ । सङ्ग्रहमाथि विमर्श समेत रहेको कार्यक्रममा लामाले आफ्ना प्रतिनिधिमूलक कविताहरू वाचन गर्नुहुनेछ ।

विद्यार्थी कालदेखि नै कविता लेख्दै आउनुभएका कवि लामा निजगढ, बारा निवासी हुनुहु्न्छ । शिक्षण पेशामा आबद्ध लामाले करिब १० वर्ष अवधिमा लेखिएका ४५ वटा कविताहरूलाई ‘बहिष्कृत आवाज’ मा ६ खण्डमा विभाजन गरी समावेश गरिएको बताउनु भएको छ ।

कवि लामाका बारेमा एसके निधन भन्नुहुन्छ- “यश लामा सतही माटोको कविता लेख्दैनन् । माटो सुमसुम्याउछन, बासनाको स्वाद लिन्छन् र माटोको उर्वराशक्तिमा उर्जात्मकता थप्ने गरि कविता लेख्छन् । उनका कविता मान्छेमाथि हुँदैनन् । उनले ती अमान्छेमाथि बज्र हान्छन् जसले मान्छेलाई मान्छे हुन रोकिराखेका छन् ।”

कवि लामा र उहाँका कविताका सम्बन्धमा कवि निमेष निखिल भन्नुहुन्छ- “कोमल काव्यिक चेतनामा प्रतिरोधी स्वर सुसेल्ने युगसचेत कवि हुन् यश लामा । आफ्नोपनको महक बोकेका उनका कविताहरूमा शालिन विद्रोहको टड्कारो हुङ्कार पाइन्छ । नवीन बिम्ब, नवीन प्रतीक र नवीन काव्यिक शिल्पको निर्माणमा अघि बढ्दै गरेका लामा समयको क्यानभासमा क्रान्ति र विद्रोहको रातोपन पोत्न उत्सुक देखिन्छन् । भुइँमान्छेको पक्षधरता, समकालीन चेतनाको गुञ्जन, शिल्पसचेतता र किनारीकृतहरूसँगको सहयात्राको आग्रहले उनका कविताको धरातल बलियो बनेको छ । कवितामा यस प्रकारको वैचारिक स्पष्टताले लामालाई अरू समकालीनबाट सहजै छुट्याउँछ । उनको पहिलो सङ्ग्रह ‘बहिष्कृत आवाज’ लाई नेपाली समाजले यसैको साक्ष्यका रूपमा पाउने छ ।

अधिवक्ता तथा लेखक ऋषि केबी भन्नुहुन्छ- “यश लामालाई चिनेको छु, सुनेको छु, पढेको छु । त्यसैले पनि ‘बहिष्कृत आवाज’ चेतना र बिद्रोहको त्यो क्रान्तिकारी छलाङ् हो भन्ने मेरो आधार र कारणसहितको ठोकुवा हो ।”

सामाजिक विषयवस्तुलाई लिएर वहिष्करणमा परेकाहरूको आवाजका साथै विभेद र असमानताका विरूद्ध साहित्यिक लेखनबाट चिनिनु भएका लामा गजलमा समेत दख्खल राख्नुहुन्छ । साङ्ग्रिला बुक्सद्वारा प्रकाशित सो कवितासङ्ग्रह लामाको पहिलो पुस्तकाकार कृति विमोचन कार्यक्रम शनिबार बिहान ११:४५ मा रोयल पार्टी प्यालेसमा आयोजना हुनेछ ।