प्रदेश युवा परिषदको कविता प्रतियोगिता; पहिलो हुनेलाई ४० हजार

मङ्सिर ३, सोमबार । प्रदेश युवा परिषद, बागमती प्रदेशको आयोजनामा खुला कविता प्रतियोगिता आयोजना गर्ने भएको छ ।

साहित्य सङ्गम मकवानपुरको व्यवस्थापनमा हुने यस प्रतियोगितामा प्रथम, द्वितीय र तृतीय पुरस्कार राशि क्रमशः ४० हजार, ३० हजार र २० हजार रुपैयाँ रहेका छन् । यस्तै सान्त्वना पुरस्कार भने १० हजार रूपैयाँ राशिको रहेको छ ।

प्रतियोगिताका लागि ४० वर्ष उमेर पार नगरेका युवा कविहरूले मात्र भाग लिन सक्ने सङ्गमका अध्यक्ष डीबी बर्तौलाले बताउनुभयो ।

जुनसुकै विषयमा मौलिक कविता रचना गरी पठाउन सकिनुका साथै कविताका लागि अधिकतम १५० शब्दसीमा तोकिएको छ । अन्यत्र प्रकाशित/प्रसारित नभएको कविता पठाउनुपर्नेछ भने प्राप्त कविताहरूमध्ये उत्कृष्ट २० कविता छनोट गरी अन्तिम प्रतियोगिता (वाचन) का लागि सहभागी गराइने आयोजकले जानकारी दिएको छ ।

मङ्सिर २० गतेसम्म कविता पठाउने मिति रहेको छ भने २० कविता छनोटको सूचना मङ्सिर २४ गते प्रकाशन गरिनेछ । यस्तै अन्तिम प्रतियोगिता मङ्सिर २९ गते हुनेछ ।

गत वर्ष समेत सङ्गमकै व्यवस्थापनमा आयोजित प्रतियोगितामा सुनसरीका कवि सुरज पराजुली प्रथम हुनु भएको थियो । प्रदीप अन्जान दोस्रो तथा एलिसा एकलास तृतीय हुनु भएको थियो भने भीमप्रसाद खतिवडाले सान्त्वना स्थान प्राप्त गर्नु भएको थियो ।