- नवसाहित्य
नवसाहित्य डटकम
१४ जेठ, हेटौँडा ।
आँचल साहित्य कला पुञ्ज मकवानपुरको पूर्वतयारी बैठक तथा पत्रकार सम्मेलन आज हेटौँडामा एक कार्यक्रमबिच सम्पन्न भएको छ।
महिलाहरूको क्रियाशील संस्था आँचल साहित्य कला पुञ्ज मकवानपुर २०६९ सालमा स्थापना भएको हो भने संस्थाले विभिन्न साहित्यिक गतिविधिहरू सञ्चालन गर्दै आइरहेको छ।
वर्षमा चारवटा बृहत कार्यक्रम गर्दै आइरहेको आँचलले हरेक वर्ष ९ जना स्रष्टाहरूलाई विभिन्न सम्मान तथा पुरस्कार प्रदान गर्ने गरेको छ। यस वर्ष भने अक्षयकोष स्थापना भएको तर बैंकको ब्याजदर घटेको कारण अक्षयकोष रकम प्राप्त भइसकेका सम्मानहरू मध्ये पाँचवटा सम्मानहरू स्थगित गरिएको र चारवटा सम्मान मात्रै प्रदान गर्न लागेको संस्थाका अध्यक्ष भावना सापकोटाले बताउनुभयो ।
सो कार्यक्रममा प्रदान गरिने सम्मान तथा पुरस्कारहरू:
मङ्गला देवी श्रेष्ठ बालप्रतिभा पुरस्कार सम्मान २०८१
बाल प्रतिभा अनसुया खनाल, तुलसी मेहर मेमोरियल माध्यमिक विद्यालय
(राशि ३ हजार ५ सय, पुरस्कार संस्थापक देवप्रसाद श्रेष्ठ)
यस सम्मानबाट हालसम्म सम्मानित बाल प्रतिभा हरू प्रज्वल ढुङ्गाना ऋतु केबी समर्पण न्यौपाने प्रसिद्धि लामिछाने हुनुहुन्छ ।
मुक्ति-तारा नवप्रतिभा सम्मान २०८१
नवप्रतिभा स्वस्तिका दाहाल
(राशि रु. ५ हजार १, संस्थापक मुक्तिगोविन्द वैद्य र तारा वैद्य)
यस सम्मानबाट हालसम्म सम्मानित नवप्रतिभाहरू प्रसिद्धिका लम्साल प्रसन्ना चौलागाईँ कृतिका लौडारी र स्वस्तिका बानियाँ हुनुहुन्छ ।
सुन्तलीमाया श्रेष्ठ युवा प्रतिभा सम्मान २०८१
कवि पुरुषोत्तम आचार्य
(राशि १० हजार १, सम्मान संस्थापक चन्द्र किरण श्रेष्ठ र मेनुका शर्मा)
यस सम्मानबाट हालसम्म सम्मानित युवा प्रतिभाहरू सुवास खनाल, छवि अनित्य, विष्णुबहादुर विश्वकर्मा र दीपक गौतम हुनुहुन्छ ।
आँचल सम्मान २०८१
अक्षय कोष संस्थापक प्रकाश लम्साल
यस सम्मानबाट हालसम्म सम्मानित साहित्यसेवीहरू मुक्ति गोविन्द वैद्य र हरिवंश भेटवाल हुनुहुन्छ।
प्रमुख जिल्ला अधिकारी स्किम श्रेष्ठको प्रमुख आतिथ्य रहने कार्यक्रममा ‘बालबालिका अभिभावक र आजको समाज’ विषयक मनोपरामर्श कार्यक्रम आयोजना गरिएको छ । सो कार्यक्रममा प्राध्यापक तथा मामाघर नेपालका संस्थापक अर्पण पराजुलीले परामर्शदाताको रूपमा सहजीकरण गर्नुहुनेछ ।
कार्यक्रममा महिला बालबालिका तथा समावेशीकरण महाशाखा प्रमुख विष्णुकुमारी लामिछाने, सिविन बाल हेल्प लाइनका जिल्ला प्रमुख झविन्द्र ज्ञवाली र श्यामकृष्ण श्रेष्ठ ‘डिजिटल स्क्रिनको प्रभाव’ विषयक बहसमा सहभागी हुनुहुनेछ ।
कक्षा ८-१२ तहस्तरीय कविता प्रतियोगितामा जेठ १४ गतेसम्म प्राप्त भएका कविताहरूमध्ये उत्कृष्ट १० छनौट गरी कविहरूको रचना वाचन गर्ने र प्रथम द्वितीय तृतीय तथा सान्त्वना स्थान प्राप्त कवितालाई पुरस्कृत गरिनेछ । पुरस्कारहरू सोही अनुसार क्रमश: १० हजार, ७ हजार, ४ हजार र १ हजार रहनेछन्।
कार्यक्रममा साहित्यकार निमेष निखिलको ‘कि नोट स्पिच’ प्रस्तुत हुने तथा मकवानपुर जिल्लाका विभिन्न साहित्यिक स्रष्टाका रचना समेत वाचन हुने अध्यक्ष सापकोटाले जानकारी दिनुभएको छ।
बैठक तथा पत्रकार सम्मेलनका क्रममा सापकोटाले कार्यक्रममा उपस्थितिका लागि साहित्यकार साहित्यनुरागी पत्रकार पुरस्कार संस्थापक आँचलका साधारण सदस्यहरू विशिष्ट आजीवन सदस्यहरू मकवानपुरका सम्पूर्ण साहित्यिक संस्था शुभचिन्तक तथा सरोकारवालाहरूप्रति आभार व्यक्त गरेको गर्नुभएको छ ।
पत्रकार सम्मेलनमा हेटौँडा उपमहानगरपालिकाको प्रवर्धनमा ‘बृहत् सांस्कृतिक तथा साहित्यिक कार्यक्रम’ जेठ १७ गते हेटौँडा पार्टी प्यालेसमा आयोजना हुने जानकारी दिइएको छ।
