‘अशान्त धड्कन’ जति पृष्ठबाट पढे पनि उत्तिकै प्रभावकारी: शर्मा

कल्पना काफ्लेको मुक्तक सङ्ग्रह ‘अशान्त धड्कन’ को हेटौँडामा विमर्श भएको छ । शनिबार मुक्तक मञ्च मकवानपुर र आँचल साहित्य कला पुञ्जको संयुक्त आयोजनामा काफ्लेको मुक्तक सङ्ग्रहमाथि विमर्श गरिएको हो ।

साहित्य सङ्गम तथा सिस्नुपानी मकवानपुरको सभाकक्षमा शनिबार आयोजित कार्यक्रममा यस कृतिमाथि विमर्शका साथै विभिन्न मुक्तककारका मुक्तकहरू वाचन भएका थिए ।

मुक्तक मञ्च मकवानपुरका अध्यक्ष सागर तिमल्सिनाको अध्यक्षता तथा महाकाव्यकार मुना धिताल अर्यालको प्रमुख आतिथ्यमा आयोजित कार्यक्रममा साहित्यकार निरा शर्मा र मुक्तककार डि.बी. बर्तौलाले समीक्षा गर्नुभएको थियो । सोही क्रममा शर्माले मुक्तक जति पृष्ठबाट पढे पनि उत्तिकै प्रभावकारी भएको बताउनुभयो । हामीकहाँ रुबाइ शैलीका मुक्तक लेखन अभ्यास रहेता पनि यस सङ्ग्रहका एकै मुक्तकमा हरफहरू लामा र छोटा हुँदा त्यसले केही अस्वाभाविक देखिएको उहाँले बताउनुभयो । यस्तै सङ्ग्रहबारे समीक्षा गर्दै अर्का वक्ता बर्तौलाले पटक पटक मुक्तक लेखनका साथै हाल यस पुस्तक प्रकाशन तथा विभिन्न संस्थागत आबद्धताले पनि मुक्तककार काफ्लेको मुक्तकप्रेम निरन्तर देखिएको बताउँदै फरक फरक मुक्तकमा समेत केही हरफ दोहोरिएकामा आउँदा सँस्करणमा त्यसलाई सच्याउनका लागि आग्रह गर्नुभयो । मुक्तककारले केही नौला शब्द आफैंले निर्माण गरेकोले त्यसले सुन्दर देखिएको तथा सो सङ्ग्रह हास्यव्यङ्ग्य, प्रेमपरक, प्रकृतिप्रेमले भरिपूर्ण रहेको टिप्पणी गर्नुभयो ।

मुक्तककार काफ्लेको व्यक्ति परिचयका क्रममा मुक्तककार भवानी तिमल्सिनाले भन्नुभयो- धनकुटामा जन्मिएकी काफ्ले वायुसेवा निगम साहित्य समाजकी संस्थापक उपाध्यक्ष हुनुहुन्छ भने लीलाध्वज थापा साहित्य प्रतिष्ठान, पल्लव साहित्य सम्मान, नेपाल भारत साहित्य सेतु लगायतका सम्मानबाट सम्मानित हुनुहुन्छ । नेपाल मुक्तक प्रतिष्ठानकी आजीवन सदस्य काफ्ले नेपाल मुक्तक प्रतिष्ठान प्रदेश एककी उपाध्यक्ष हुनुहुन्छ ।

मुक्तककार कल्पना काफ्लेले आफू भाषाका विद्यार्थी भएकाले पनि पुस्तकमा देखिएका कमजोरीलाई स्वीकार्दै आगामी दिनमा सच्याउँदै जाने बताउनुभयो । यस्तै यसअघि समेत मकवानपुरले आफूलाई सम्मान गरेको बताउँदै मुक्तक मञ्च तथा विमर्श कार्यक्रममा उपस्थित सबैप्रति धन्यवाद ज्ञापन गर्नुभएको सो कार्यक्रमलाई एलिजा पुडासैनीले सहजीकरण गर्नु भएको हो ।