पर्याकविता प्रतियोगितामा पौडेल, जोशी र किरण सिवा पुरस्कृत

पौष २६, नवसाहित्य । राष्ट्रिय पर्याकविता प्रतियोगिता २०८२ मा मकवानपुरका किशन पौडेल (कविताः दोहन) प्रथम हुनु भएको छ । प्रतियोगितामा कैलालीका मोहित जोशी (कविताः समयको अन्त्यको किनारमा उभिएर) द्वितीय र किरण सिवा (कविताः मौन प्रकृति) तृतीय हुनुका साथै तनहुँका नरोत्तम श्रेष्ठ (कविताः बीउको रक्तिम घोषणा) र काठमाडौँका यशोदा अधिकारी (कविताः धर्तीको विघटन) सान्त्वना घोषित हुनु भएको हो । प्रथम, द्वितीय, तृतीय र दुइ सान्त्वना विजेताहरूलाई क्रमशः ३० हजार, २० हजार, १० हजार र ५/५ हजार नगद राशि र सम्मानपत्रसहित सम्मान गरिएको हो ।
कूल १६४ कविताबाट छनोट भइ उत्कृष्ट १० को सूची प्रकाशनपश्चात् वाचन प्रक्रियालाई समेत आधार मानी कूल अङ्क गणना गर्दै प्रतियोगिताका विजयी घोषित गरिएको हो निर्णायकद्वय पर्या साहित्य लेखक विजय हितान र साहित्यकार डा. निमेष निखिलले जानकारी दिनुभयो ।
साहित्य सङ्गम मकवानपुरको ३९ औं वार्षिकोत्सवको अवसरमा आयोजित तेस्रो राष्ट्रिय पर्याकविता प्रतियोगिताका साथै ‘नेपाली साहित्यमा पर्याचेतना’ विषयक बहस समेत सञ्चालन गरियो । साहित्यकार सुवास खनालले सहजीकरण गर्नु भएको बहसमा पर्या अभियन्ता विजय हितान (चितवन), पर्या साहित्यकार ईश्वर कँडेल (ईश्वर कँडेल) र समीक्षक घनश्याम घिमिरे (मकवानपुर) को सहभागिता रह्यो ।
प्रकृतिले कुनै न कुनै सन्देश दिइरहने र सो सन्देशलाई समयमैँ बुझ्न नसके मानवले भयावह नतिजा भोग्नुपर्ने हुनाले दीगो विकासको अवधारणालाई व्यापक अध्ययन र अनुसन्धान गर्दै विकासका गतिविधि सञ्चालन गर्नुपर्नेमा बहसकर्ताहरूको जोड रहेको थियो ।
मानव श्रेष्ठ प्राणीको रूपमा मानवले नै घोषणा गरेकाले प्रकृतिका अघि सानो अंश मात्र रहेको यथार्थता बिर्सन नहुने बताउँदै उहाँहरूले साहित्यमा प्रकृति अर्थात् पर्या चेतले स्थान पाउँदै गएको र यसले व्यापकता पाउनुपर्ने आवाज उठाउनुभयो ।
साहित्य संगम मकवानपुरका अध्यक्ष डीबी बर्तौलाको अध्यक्षता तथा हेटौँडा उपमहानगरपालिकाकी प्रमुख मीनाकुमारी लामाको प्रमुख आतिथ्यमा आयोजित कार्यक्रममा हेटौँडा उपमहानगरपालिका ४ नम्बर वडाध्यक्ष नवीन सिग्देल, साहित्यकार तुलसी घिमिरे, महाकाव्यकार मुना अर्याललगायत विशिष्ट अतिथि रहनु भयो ।
साहित्य सङ्गम मकवानपुरकी सचिव रजनी पौडेलले सहजीकरण गर्नु भएको सो कार्यक्रम हेटौँडा पार्टी प्यालेसमा आयोजना भएको हो ।