जेठ १७, बिहिबार
साहित्यकार उषा शेरचनको नवीन पुस्तक ‘बेग्लै म’ पाठकमाझ आइपुगेको छ । जेठ १४ गते दोस्रो कथा सङ्ग्रह “बेग्लै म” फेसबुक लाइभबाट सार्वजनिक गरिएको हो ।

कथासङ्ग्रह तेस्रो रङ्ग १० वर्षअघि सोही दिन सार्वजनिक अवसरमा सो पुस्तक ल्याइएको र समाजमा रहेका उठाउनै पर्ने मुद्दामा केन्द्रित भएर कथाहरू लेखिएको साहित्यप्रेमी, शुभचिन्तक, साहित्यकार तथा पाठकहरूमा जानकारी गराउनु भएको छ । कथा लेखनमा अन्य विषयभन्दा धेरै अध्ययन र अनुसन्धान गर्नुपर्ने उहाँ बताउनु हुन्छ ।

पारिजात राष्ट्रिय प्रतिभा पुरस्कार, राष्ट्रिय मुक्तक पुरस्कार २०८० लगायत विभिन्न सम्मान र पुरस्कारबाट सम्मानित शेरचन पोखरामा नेपाल सङ्गीत तथा नाट्य प्रज्ञा प्रतिष्ठानका कुलपति सरुभक्तसँग २०३५ सालमा टिकटमा मुक्तक अभियानका एक महत्वपूर्ण सदस्य समेत हुनुहुन्छ ।

उहाँका कथाहरूमा शेरचन नारीमाथिको उत्पीडन, प्रपञ्च र अत्याचारमा विद्रोह गर्नुपर्ने तथा प्रतिरोध गर्नुपर्ने सन्देशहरू पाइन्छन् । उहाँका ‘नजन्मेका आस्थाहरु’ (कविता सङ्ग्रह, २०४८), ‘अक्षरहरुका शिविरबाट’ (मुक्तक सङ्ग्रह, २०५६), ‘सर्वकालीन पीडा र जागृतिका शङ्खघोष’ (कविता सङग्रह, २०६३), ‘तेस्रो रङ्ग’ (कथा सङ्ग्रह, २०७०), ‘आधि’ (उपन्यास, २०८०) प्रकाशित छन् । शेरचन ‘खोलीको दुइ किनार भो’ लोकप्रिय गीतकी रचनाकार समेत हुनुहुन्छ भने उहाँका केही गीति एल्बमहरू सार्वजनिक भइसकेका छन् ।

जेठ १६, बुधबार
नवसाहित्य अनलाइन । भरतपुर महानगरपालिकाद्वारा आयोजित राष्ट्रिय पर्या कविता प्रतियोगिता २०८१ को नतिजा सार्वजनिक गरिएको छ ।

निजी क्षेत्रसँग सहकार्यमा “घुमौँ भरतपुर” भन्ने मूल नाराका साथ पर्यटन क्षेत्रलाई प्रवर्धन गर्ने उद्देश्यले गरिएको वृहत अभियान “भरतपुर भ्रमण वर्ष २०२४” को सन्दर्भमा आयोजित पर्या कविता प्रतियोगिता २०८१ मा १० उत्कृष्ट कविताहरू सार्वजनिक भएका हुन् ।

छनोट भएका कवि तथा कविताहरू यसप्रकार रहेका छन्:
१. खगेन्द्र अटल (खगेन्द्रप्रसाद आचार्य): मान्छे र पृथ्वी
२. परिवेश चापागाईँ/परिवेश मुन्छे: भेन्टिलेटरको सहर
३. बुद्धीबल श्रेष्ठः परलोकको बाटो
४. भरत थापाः इन्द्रेणी सपना
५. मणिसुन्दर कोइराला (सुन्दर सिरिप): धरतीको बकपत्र
६. रेणुका जी सी: उभिएर आफ्नै चिहानमाथि
७. समर्पण न्यौपाने: अनन्त मुस्कान
८. सिजन श्रेष्ठ: पर्वतको यात्रामा
९. सुलभ अधिकारी: धरती रहेसम्म
१०. सुवास सिन्तान (सुवास सजल): चौतारोः एक आत्मालाप

१० कविहरूमध्ये दैलेख, चितवन, नेपालगञ्ज, धनकुटा, सिन्धुपाल्चोक, रौतहट, सङ्खुवासभा र नवलपरासीका १/१ तथा मकवानपुरका २ जना रहनु भएको छ ।

आगामी जेठ १९ गते शनिबार भरतपुर २२ स्थित अम्ब्रेला स्ट्रिट पटिहानीमा कविता वाचनका लागि सहभागिता रहने कार्यक्रम संयोजक तथा कवि भूपिनले जानकारी दिनु भएको छ ।

बैशाख २१ गते जारी सूचनाअनुसार कविता प्रेषणका लागि जेठ ११ सम्मको सिमा तोकिएको प्रतियोगिताका लागि कूल २४५ कवितामध्ये उत्कृष्ट १० कविता छनोटमा परेका हुन् । हरिया कविता लेख्नुपर्छ भन्दै पृथ्वीको सुन्दरताको बयान मात्र नभइ यसको रक्षाका विषयमा कला र साहित्यले जोड दिनुपर्ने बताउने यस कार्यक्रमका संयोजक कवि भूपिन प्रकृतिसम्बद्ध साहित्य सिर्जना र सोसम्बन्धी विभिन्न अभियानमा लामो समयदेखि संलग्न हुनुहुन्छ ।

प्रतियोगितामा प्रथम पुरस्कार ३० हजार, द्वितीय २० हजार, तृतीय १० हजार र सान्त्वना २ जनाले जनही ५ हजारका साथै प्रमाणपत्र प्राप्त गर्नेछन् भरतपुर महानगर प्रज्ञा प्रतिष्ठानका सदस्य सचिव बालकृष्ण थपलियाले जानकारी दिनु भएको छ ।

जेठ १६, बुधबार
नवसाहित्य अनलाइन । नेपाली लेखक सङ्घ चितवनको अध्यक्ष पदमा शान्ति शर्मा चयन हुनु भएको छ । यसअघि उपाध्यक्ष रहनु भएको उहाँ अध्यक्ष चयन हुनु भएको हो ।

चितवन साहित्य परिषद्की सचिव समेत रहनु भएको शर्मालाई आइतबार बसेको कार्यसमिति र सल्लाहकार समितिको संयुक्त बैठकले सो नेतृत्व हस्तान्तरण गरेको हो । यसअघि साहित्य सर्जक सुरेन्द्र अस्तफल अध्यक्ष रहनु भएको थियो भने उहाँ केन्द्रिय सदस्य निर्वाचित हुनु भएपछि शर्मालाई कार्यबाहक अध्यक्षको जिम्मेवारी दिइएको थियो ।

सङ्घको चितवन शाखाको सचिवमा लेखराम सापकोटा, कोषाध्यक्ष मुरारीप्रसाद खनाल, सहसचिव पदमप्रसाद अर्याल तथा सदस्यहरूमा कमल अर्याल, शिवहरि अधिकारी, मित्रराज घिमिरे, राधा कोइराला, रामकृष्ण अनायास र सिम्रन क्षेत्री हुनुहुन्छ । साथै सल्लाहकार समितिमा डा. एकनारायण पौड्याल, केदारनाथ खनाल, रामबाबु घिमिरे र गायत्री श्रेष्ठ रहनु भएको छ । (तस्बिरः लेखराम सापकोटा)

जेठ १५, मङ्गलबार
नवसाहित्य अनलाइन । पुरूषोत्तम आचार्यद्वारा लिखित ‘उठ हे युवा’ बोलको गीत लेखक स्वयम् र हरि पौड्यालको स्वरमा सार्वजनिक गरिएको छ । औपचारिक कार्यक्रमका क्रममा अओ गीत प्रत्यक्ष गायनका साथ सार्वजनिक गरिएको हो ।

सार्वजनीकिकरणमा ३ टिप्पणीकर्ताहरूले गायन र सिर्जनामाथि बोल्नुभ‌एको थियो । सोहीक्रममा नवसर्जक नेपालका महासचिव समर्पण न्यौपानेले गीतले युवाको भूमिका, क्रान्तिका कुरा, परिवर्तनका मुद्दा उठान गर्नुका साथै आम मानिसका जनजीविकाका कुराबारे बोलेको छ उहाँले शाब्दिक त्रुटी सुधार हुनुपर्ने विषयबारे टिप्पणी गर्नुभयो ।

नेपाल प्रज्ञा प्रतिष्ठान काव्य विभाग सदस्य शान्ति प्रियबन्दनाले गीतले देश र युवाको समस्या उठान गरेको र शब्दहरूले मष्तिष्कलाई छोएकोले यस्तै वा अझ सशक्त सिर्जना भविष्यमा पनि आउने अपेक्षा रहेको बताउनुभयो ।

साहित्य सङ्गम तथा नवसाहित्य अनलाइनका सल्लाहकार श्यामकुमार बानियाँले कविता, गजल, गीत लेखनका साथसाथै गायनमा समेत सक्रिय आचार्यका ‘म हुँ पुतली’, ‘घाम त झुल्क्यो’, ‘उठ हे युवा’ गीतहरूले उहाँको परिचय बनिसकेको र भविष्यमा अझ सुन्दर सिर्जना हुने अपेक्षाका साथ रेकर्डिङमा शब्दलाई सङ्गीतले न्याय गर्न नसकेको आफूले महशुस गरेको बताउँदै गीतमाथि आफ्ना टिप्पणी राख्नुभयो ।

साहित्य सङ्गम मकवानपुरका अध्यक्ष डीबी बर्तौलाले आशा जगाउने गीतमार्फत् युवालाई यही माटोमा रहेर आफ्नो कर्म गर्न प्रेरित गर्ने कालजयी गीत बनेको बताउँदै समपूर्ण साहित्यिक संस्थाका तर्फबाट प्रतिनिधित्व गर्दै शुभकामना व्यक्त गर्नुभयो ।

कार्यक्रमका क्रममा गायकद्वय हरि पौड्याल र पुरूषोत्तम आचार्यले ‘उठ हे युवा’ गीत गाउनुभ‌एको थियो ।

गीतकार तथा कार्यक्रमका प्रमुख अतिथि सुवासचन्द्र ढुङ्गेलले दिनेश अधिकारीको गीतका हरफ वाचन गर्दै काठमाडौँमा समेत गीतमाथि यसरी चर्चा कमै हुने गरेको बताउँदै गीतको शब्दको तौल अनुसार सङ्गीत र गायनले त्यसलाई अझ सुन्दर बनसुनर भन्दै गुल्जार र जगजीत सिंहका प्रसङ्गहरू जोड्नुभयो । उहाँले
देशभक्तिका गीत सुन्ने चलन हराइरहेको ‘ड्राइ एरिया’ मा गीत निर्माण हुनु नै सर्जकहरूको सफलता रहेको बताउनुभयो । ढुङ्गेल विगत ४५/४६ वर्षदेखि गीत लेखनमा सक्रिय हुनुहुन्छ भने ‘जति चोट दिन्छौ देऊ मायालु’, ‘चोट के हो व्यथा के हो’ लगायत सयौँ गीतका स्रष्टा समेत हुनुहुन्छ ।

सर्जक सञ्जाल मकवानपुरका संयोजक तथा कार्यक्रमका सभाध्यक्ष निमेष निखिलले मानव संवेदनासँग सबैभन्दा सजिलै जोडिने साहित्य, गीत, सङ्गीतका रचना भ‌एकोले आचार्य तथा पौडेलका सो गीतले अज परिवर्तनको बाहक बन्ने अपेक्षाका साथ उपस्थित सबैमा धन्यवाद ज्ञापन गर्नुभयो ।

कार्यक्रममा मकवानपुर आसपासका साहित्य सर्जक, साहित्य सेवी, विभिन्न कार्यालयका कर्मचारी, पत्रकारलगायतको उपस्थिति रहेको थियो ।

गाउँमा घाँसका भारी बोक्दै गीत सिर्जना र गायन गर्दै आएको बताउँदै गायक आचार्यले गीत सिर्जनाका लागि आरम्भ सी, वाद्यवादक, एरेञ्जरका साथै कार्यक्रम स्थल निशुल्क उपलब्ध गराउने रोयल प्यालेस तथा सर्जकहरूको प्रेरणा र आत्मियता अनि निरन्तरको सम्बन्ध नै आफ्नो सिर्जनामा प्रेरणा मिलेकोमा सबैमा धन्यवाद व्यक्त गर्नुभयो ।

वर्षातका कारण तोकिएको समयभन्दा केही ढिला सुरू भ‌एको कार्यक्रम समयमैँ सकिएको आयोजकले जनाएको छ भने सो कार्यक्रमलाई पत्रकार तथा गजल मञ्च मकवानपुरका अध्यक्ष केशव समर्पणले सहजीकरण गर्नुभ‌एको हो ।

जेठ १४, सोमबार
नवसाहित्य अनलाइन । ‘द पोएट आइडल’ सिजन २ को ग्य्राण्ड फिनालेमा सिक्किमका कवि शिमियोन सुकिता राई विजयी हुनु भएको छ । तीन प्रतिस्पर्धीलाई पछि पार्दै शिमियोन विजेता बनेका छन् । विजेता घोषणा भएसँगै कवि राईले १० लाख रुपैयाँ र अन्य सुविधाहरु पनि प्राप्त गरेका छन् ।

‘द पोएट आइडल’ सिजन २ को शनिबार आयोजित ग्य्राण्ड फिनालेमा धादिङकी कवयित्री डा. मुस्कान पोखरेल, धनगढीका कवि मोहित जोशी, इलामका कवि विजय लुइँटेलले पनि ट्रफी र अन्य उपहारहरु प्राप्त गर्नु भएको छ ।

राईले नगद पुरस्कारका साथै एभरेस्ट फिल्म कलेजबाट १ वर्षको स्नातक अध्ययनको छात्रवृत्ति, कथालयसँग पुस्तकको सम्झौता, उत्पला क्याफेको तर्फबाट १ लाखको गिफ्ट भौचर प्राप्त गर्नुभयो ।

माघ २९ गतेदेखि हिमालय टिभीमा प्रसारण हुँदै आएको रियालिटी शो ‘द पोएट आइडल-२’ अमन प्रताप अधिकारीको निर्देशन र दिव्यदेव पन्त प्रस्तुतिमा सञ्चालन भइरहेको छ । कार्यक्रमका निर्णायकहरुमा विप्लव प्रतिक, अनुप बराल, उपेन्द्र सुब्बा र केकी अधिकारी हुनुहुन्थ्यो ।

‘द पोएट आइडल-१’ को विजेता सिक्किमकै कवि निलम गुरुङ बनेकी थिइन् ।

जेठ ३१ गते शुक्रबारदेखि तेस्रो सिजनको प्रसारण सुरु हुने भएको छ । फिनालेका क्रममा ‘भ्वाइस किड्सको सिजन ३’ को प्रोमो देखाइएको थियो भने तीन सिजनसम्म हिमालय टिभीमैँ प्रशारण हुने निर्देशक अधिकारीले जानकारी दिनु भएको छ ।