पुस २०, शुक्रबार
मकवानपुर । लेखक माधव काफ्ले जगदीश घिमिरे साहित्य पुरस्कार २०८० बाट पुरस्कृत हुनु भएको छ । रामेछापको मन्थलीमा आयोजित समारोहमा वरिष्ठ स्रष्टा तुलसी दिवसको प्रमुख आतिथ्यमा रहेको कार्यक्रममा निबन्धकार काफ्लेले ५१ हजार राशिको जगदीश घिमिरे पुरस्कार प्राप्त गर्नु भएको हो । जगदीश घिमिरे प्रतिष्ठानले घिमिरेको १० औं स्मृति दिवसको अवसरमा प्रदान गरेको हो । यसअघि मनु ब्राजाकी, रोचक घिमिरे, डा. सन्दुक रुइत र ध्रुव सापकोटा उक्त पुरस्कारबाट पुरस्कृत भइ सक्नु भएको छ । यसै महिनामा काफ्लेले १० हजार राशिको रमेश विकल सिर्जना पुरस्कार समेत प्राप्त गर्नु भएको थियो ।
रामेछापको मन्थलीमा विसं. २००२ सालामा जन्मिनु भएका स्वर्गीय घिमिरे साविति, लिलाम, अन्तर्मनको यात्रा, सकसजस्ता चर्चित कृतिका कृतिकार हुनुहुन्छ । नेपाली साहित्यमा नौलो शैलीको कृति ‘अन्तर्मनको यात्रा’ ले २०६४ सालको मदन पुरस्कार जितेको थियो ।
नगेन्द्रराज शर्मा, माधव काफ्ले, उषा शेरचन, हरिकृष्ण काफ्ले, मनोज न्यौपाने, अश्विनी कोइराला, डा. सुमन कर्माचार्य, नविन केसी, रमेश ढुंगेललगायत कविहरुले आ-आफ्ना रचना तथा साहित्यमा जगदीश घिमिरेले पुर्‍याएको योगदानको चर्चा गर्नु भएको थियो ।

पौष २०, शुक्रबार
मकवानपुर । प्रा.डा. ध्रुवेशचन्द्र रेग्मीद्वारा लिखित दुई पुस्तक लोकार्पण शनिबार हुन लागेको छ ।
प्रा.डा. अभि सुवेदी, प्रा. दीपक जङ्गम, प्रा.डा. वीणा पौड्याल र डा. लोचन रिजाल वक्ता रहने उक्त कार्यक्रम भोजन गृह, डिल्लीबजार, काठमाडौंमा हुनेछ ।
प्रकाशन गृह बुक हिलबाट प्रकाशित उक्त कृति लोकार्पण समारोहमा साङ्गीतिक उत्सव समेत रहने प्रकाशक भुपेन्द्र खड्काले जानकारी दिनु भएको छ ।
पुस्तकका सम्बन्धमा उहाँ भन्नुहुन्छ- “यदि तपाईंले कुनै काम प्रेमपूर्वक गर्नुभएको छ भने त्यो ठूलो सफलता हो ।
हुन त हरेक व्यक्ति समाज, संस्कृति र तिनीसँग जोडिएका सामाजिक लयहरूसँग जोडिएको हुन्छ । समाजका धर्म, कर्म र रीतिरिवाजमा मिसिंदै गर्दा नजानिंदो गरी सङ्गीतमा नजिकिएको हुन्छ ।
म पनि त्यस्तै भएँ । मलाई सङ्गीत मन मात्रै पर्दैन; सङ्गीतबिनाको जीवन म परिकल्पना गर्न पनि सक्दिनँ ।
यो किताब त्यही सङ्गीतको किताब हो; जसले आफ्नो इतिहास इमानदारीपूर्वक भन्छ ।”

पुस २०, बुधबार
मकवानपुर । मैथिली भाषा, साहित्य, कला, संस्कृति, अर्थ र पर्यटन प्रवद्र्धनका लागि जनकपुरधाममा जनकपुर साहित्यकला तथा अन्तर्राष्ट्रिय नाटक महोत्सव २०८० हुने भएको भएको छ ।
मैथिली विकास कोषको गत बुधबारको बैठकले आउँदो माघ १८ गतेदेखि २२ गतेसम्म हुने जनकपुर साहित्यकला तथा अन्तर्राष्ट्रिय नाटक महोत्सव आयोजना गर्ने निर्णय गरेको हो ।
महोत्सव जनकपुरधामको महेन्द्र नारायण निधि मिथिला संस्कृतिक केन्द्रमा हुने तथा महोत्सव ५ दिनसम्म सञ्चालन हुने आयोजकले जानकारी दिएको छ । महोत्सवमा राजनीतिक, सामाजिक, साहित्यक र आर्थिक विषयउपर विमर्श हुने कोषका अध्यक्ष चौधरीले जानकारी दिनु भएको छ ।
नेपाल र भारतका कलाकारबाट मैथिली, नेपाली, हिन्दी, असामी र बङ्गाली गरी पाँचवटा भाषामा नाटक प्रदर्शन हुनेछ भने महोत्सवमा मिथिला चित्रकला, पुस्तक, नाटक, मिथिलाको भोजनको विभिन्न परिकारको प्रदर्शनी तथा सांस्कृतिक कार्यक्रमसमेत हुनेछ ।
नेपाल र भारतका विद्वान्, विदूषि, सामाजिक अभियन्ता, रङ्गकर्मी तथा राजनीतिकर्मीको सहभागिता रहने सो महोत्सव २०७३ सालदेखि निरन्तर हुँदै आएको छ । महोत्सवलाई मधेस प्रदेश सरकार र जनकपुरधाम उपमहानगरपालिकाले आर्थिक सहयोग गरेको छ ।